GENERAL SANTOS CITY - Gilutos sa mga awtoridad ang nananom sa liboan ka punoan sa marijuana nga gironda sa kapulisan ug militar adlaw nga Martes, Marso 19 sa Sarangani Province.
Matud ni Malungon Chief of Police, Lieutenant Colonel Jovenson Bayona nga nakadawat sila og taho gikan sa mga sibilyan sa usa ka marijuana plantation sa bukiron nga parte sa Malungon utlanan sa Kiblawan Davao del Sur.
Gironda dayon sa mga pulis gikan sa Malungon ug kapulisan sa Police Regional Office (PRO) 11 inabagan sa militar ang plantansyon sa marijuana.
Giibot sa mga awtoridad ang 11,500 fully-grown marijuana plants nga nagkantidad og P2.3 milyon base sa drug market value niini.
Sumala kang Municipal Information Office (MIO) Officer Isagani Palma nga gidayeg ni Malungon Mayor Atty. Tessa Constantino ang malampusong pagronda sa plantasyon sa marijuana.
Sa kasamtangan gipalig-on pa sa kapulisan sa Malungon Sarangani Province ang kampanya batok sa mga gidiling druga.