LAING gikonsiderang kalampusan sa giyera kontra sa ilegal nga druga ang nakab-ot sa kapulisan sa Police Regional Office-Davao Region (PRO 11) human makaaresto og 75 ka mga indibiduwal nga nalambigit sa druga, apil niini ang 11 ka mga gikonsiderang High Value Individuals (HVIs) ug 64 ka mga Street Level Individuals (SLIs).
Kini subay sa gilusad nga 59 ka police operations sulod lang sa usa ka semana niadtong Oktubre 21 hangtud Oktubre 27, 2024.
Ang naaresto nga HVIs naglakip sa Top 1 Regional Level nga nailhan nga si alyas JP, kinsa nadakpan sa hiniusang drug bust sa Purok Cara 3, Madang, Barangay Central, Mati City, Davao Oriental niadtong Oktubre 22, 2024.
Dugang pa nga sa pagkasunod adlaw, Oktubre 23, 2024, ang kapulisan pinaagi sa pakig-alayon uban ang Philippine Drug Enforcement Agency-Davao (PDEA 11) nilampos sa pagpuhag sa nabantog nga drug den sa Davao de Oro nga niresulta sa pagka-aresto sa usa ka gikonsiderang Provincial Target List drug personality nga nailhang si alyas Ruel, uban ang tulo pa ka mga HVIs nga naaktohan nga tua sa lugar sa dihang gihimo ang operasyon.
Samtang gawas sa mga naaresto, ang operasyon niresulta sa pagkasakmit sa kapulisan sa mga ilegal nga druga sama sa methamphetamine hydrochloride labing nailhan nga shabu nga nitimbang og 326.6886 gramos nga dunay standard drug price nga P2,221,482.48.
Lakip sa nasakmit mao ang 209 ka "hill" sa marijuana ug 2781.9 gramos sa tanum niini nga dunay standard drug price nga P375,628.00 nga nisumada og kinatibuk-ang P2,597,110.48.
Giingong ang kalampusan sa operasyon sa PRO 11 nagpakita sa way puas nga paningkamot ug padayong dedikasyon sa pagwagtang sa ilegal nga druga sa rehiyon ug pag-aresto sa top rank drug individuals isip suporta sa "recalibrated" nga paagi batok sa ilegal nga druga sa pamunoan sa Philippine National Police. (Wenz G. Mendoza)