HUMAN ang taudtaud nga paghupohupo sa otoridad, nasakmot ang inilang tigpayuhot og illegal nga druga sa probinsiya sa Maguindanao del Norte.
Kasong paglapas sa Republic Act 9165 o Comprehensive Dangerous Drug Act of 2002 ang atubangon sa dinakpan sa operasyon nga gihimo pasado alas 2 p.m. niadtong Lunes, Abril 22, 2024.
Ang dinakpan giila nga si Jobert Balleque Paches, 27, minyo nga taga Sitio Salamat, Barangay Mother Poblacion, Cotabato City.
Sigun ni Sultan Kudarat Chief of Police Lieutenant Colonel Esmail Madin nga nagpahigayon sila og buy-bust batok sa suspek sa Barangay Limbo, Sultan Kudarat, Maguindanao Del Norte.
Dihang gitunol ni Paches ang shabu sa usa ka police asset didto na siya gidakop.
Nakuha gikan kaniya ang walo ka pakete sa shabu nga mibalor og P2,720,000.
Gibalhog ang suspek sa prisuhan sa Sultan Kudarat Maguindanao Del Norte samtang gihulat ang pormal nga pagpasaka sa kaso batok kaniya. (EEF)