HIMAS rehas na samtang naghuwat sa kasong atubangon ang upat ka indibidwal nga nasikop atol sa buy-bust operation, alas 4 sa hapon, Abril 18, 2024, sa Cotabato.
Mga gisikop mao sila Sampulna Magui, Tammy Magui, Arman Engga ug Noraida Sulaiman.
Kaso nga kalapasan sa Republic Act 9165 o Comprehensive Dangerous Drug Act of 2002 ang atubangon sa upat.
Gibutyag ni Philippine Drug Enforcement Agency-Bangsamoro Autonomous Region (PDEA-BAR) Regional Director Gil Cesario Castro nga ang operasyon gihimo nila uban ang kapulisan sa Suraik Macmud, Corner Almonte Street, Barangay Poblacion 2, Cotabato City batok sa mga suspek.
Dihang gitunol na ang shabu sa mga suspek sa poseur buyer, dali silang giposasan sa ahente.
Nakuhaan ang upat og 10 ka jumbo size sa shabu nga mitimbang og 500 gramos nga mobalor og P3,400,000.
Nakuha sab ang mga drug paraphernalias, brown sling bag, upat ka cellphone, ug kuwarta nga gigamit buy-bust operation.
Ang dinakpan anaa sa Jail facility sa PDEA-BAR sa Cotabato City. (Edgardo E. Fuerzas)