GITAHO sa City Environment and Natural Resources Office (Cenro) nga ang ilang buhatan nakakolekta og P5 milyon nga multa sukad 2022 tungod sa makakalikopan nga kalapasan.
Sa taho nga gihatag ngadto sa mga tigbalita, gikanayon sa Cenro nga nakakolekta sila og kinatibuk-ang P5,267,000 nga multa sukad 2022. Kini nga balor nitukma sa 8,140 ka malapason kinsa nibayad og multa atol sa maong panahon. Sa kinatibuk-ang P1,259,000 nakolekta niadtong 2022, P1,573,500 sa 2023, ug P2,434,500 sa 2024.
Samtang, ang nag-unang unom ka gilapas nga sumbanan ilawom sa implementasyon sa City Ordinance 036-10, labing nailhan isip Davao City Ecological Solid Waste Management Ordinance, una mao ang pagsalibay, pagkatag-katag, paglabay ug pagdan-ok sa mga basura sa pumpublikong mga lugar uban ang 3,784 ka malapason.
Gisundan sa pagdan-ok og mga patay nga lawas sa hayop sa mobile garbage bins o sa collection point nga niabot og 807 ka malapason, pagsunog og mga basura nga niabot og 112, wala naglain sa mga basura nga niabot og 18, pagdan-ok og basura sa mga lugar gawas sa disposal facility sa dakbayan nga 16, ug wala mag-implementar og solid waste management plan ug program nga walo.
Gawas niadtong nibayad sa ilang mga multa, ang Cenro sukad 2022 dunay 2,755 ka mga kaso nga gihusay sa korte base sa datus nga gihatag sa branch 7, Municipal Trial Court (MTC). Sa maong ihap, 963 niini nangaliyupo nga sad-an, 983 aktibo, 308 gidismis, tulo gisibog, ug 520 giisyuhan og warrants of arrest.
Giawhag ni Engineer Lakandiwa Orcullo, pangulo sa Cenro’s Environmental Waste Management Division ang publiko nga magpraktis og saktong paglabay sa basura ug mosunod sa ordinansa sa siyudad. Iya sab nga gidasig ang pagtuman sa 3Rs (reduce, reuse, recycle) aron pagprotekta sa panglawas sa publiko ug palibot.
“Bago ta mopalit og usa ka butang huna-hunaon sa nato og kinahanglan ba gyud nato paliton ug naa tay mga daut na mga gamit kailangan lang seguro nato i-repair kaysa mopalit ta og bag-o aron dili mo-generate og more waste,” tambag niya atol sa ISpeak media forum, Huwebes sa buntag, Hunyo 20, 2025, sa City Mayor’s Office.
Gimando sa Davao City Ecological Solid Waste Management Ordinance ang paglain sa mga basura sa siyudad. Ang ordinansa gi-implementar ubos sa Republic Act No. 9003, labing nailhan isip Ecological Solid Waste Management Act of 2000, nga nagnagmando sa mga panimalay nga ilain ang mga basura ngadot sa biodegradable, recyclable, ug residual nga kategoriya.
Malapason sa city ordinance moresulta sa multa nga gikan P1,000 hangtud P5,000, ug posibleng maglakip og pagkapriso o community service, mag-agad sa espisipiko nga kalapasan. (Rojean Grace G. Patumbon)