P51,000 kantidad sa mga pabuto nasakmit sa pulis

P51,000 kantidad sa mga pabuto nasakmit sa pulis
File photo

MOABOT sa P51,500 kantidad sa ilegal nga firecrackers sa tibuok Davao Region ang nasakmit sa Police Regional Office-Davao Region atol sa kapaskohan.

Ang maong kantidad natala gikan sa 11,500 ka komon nga firecrackers sama sa picolo, pla-pla, pop-popo, triangle, lantaka o ginama nga pabuto gamit ang kawayan suibay sa paghinabi sa radyo ni PRO-Davao Region spokesperson Police Major Catherine Dela Rey niadtong Miyerkules sa buntag, Enero 3, 2024.

Kasagaran sa pyrotechnic ug flammable nga mga butang nasakmit sa Davao City, Panabo, Tagum, ug Davao del Norte.

Sa Davao City lang, mga 169 ka buok nga lantaka ang nasakmit sa Davao City Police Office (DCPO) base sa ilang taho gikan Disyembre 16, 2023 hangtud Enero 1, 2024.

Ang ahensiya nagtaho sab nga "zero incidents" sa indiscriminate firing sa ilang hurisdiksiyon tungod sa City Ordinance 060-02 o ang Firecracker Ban.

Sa pikas bahin, ang Davao Region nag-update sa ihap sa Fireworks Related Injuries Report (FRWI) gikan sa sais hangtud sa 12 ka biktima gikan Disyembre 21, 2023 hangtud Enero 4, 2024.

Apan walay gitaho nga namatay.

Sa maong ihap nga gihatag sa Department of Health-Davao Region (DOH-Davao Region), pito kanila gikan sa Davao del Norte; tulo gikan sa Davao de Oro; ug usa sa Davao del Sur ug Davao Oriental sa maong han-ay.

Apil sa mga biktima mao ang sais anyos nga babaye gikan sa Davao de Oro.

Samtang usa ka 23-anyos nga indibiduwal gikan sa Maco, Davao de Oro mao lang ang biktima sa indiscriminate firing gikan sa wala masayring kalibre nga pusil; apan gipasalig sa PRO-Davao Region nga mohimo sila og imbestigasyon ug ang saag nga bala nga nahabilin sa lugar ipailawom sa ballistics examination.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph