STA. CRUZ, Davao del Sur — Mokabat sa P70,040 ang nasakmit sa mga awtoridad nga balor sa ilegal nga druga gikan sa naaresto nga mananagat ug estudyante nga menor de edad alas 2:40 ang takna sa kaadlawon, kagahapon, Oktubre 16, 2024.
Nadakpan ang mga nahisgutan sa Sitio Lubo, Zone 1, Sta. Cruz, Davao del Sur pinaagi sa hiniusang puwersa sa kapulisan sa Sta. Cruz Municipal Police Station, Regional Mobile Force Battalion (RMFB 11), Provincial Intelligence Unit (PIU)/Provincial Drug Enforcement Unit (PDEU) sa Davao del Sur Provincial Police Office, 1st Davao del Sur Provincial Mobile Force Company (DSPMFC), Maneuver Company sa Regional Mobile Force Battalion (MC-RMFB 11) ug ginsakpan sa Philippine Drug Enforcement Agency (PDEA) sa Davao del Sur.
Nasignit mao si alyas Elvin, 22-anyos, ulitawo, molupyo sa Sitio Tacub, Barangay Zone 1 sa maong lungsod, ug si alyas Indang, 17-anyos, estudyante sa Alternative Learning System (ALS), ug residente sa Sitio Tacub sa nahisgutang barangay ug lungsod.
Nakuha sa mga awtoridad gikan sa mga dinakpan mao ang usa ka buok nga elongated transparent heat sealed sachet nga dunay sulod sa gituohang shabu nga dunay gibug-aton nga gibana-bana sa 0.3 gramo nga dunay standard drug price nga P2,040; duha pa ka buok sachet nga dunay gibug-aton nga 10 gramos nga dunay SDP nga P68,000; usa ka buok P1,000 nga kuwartang papel nga dunay serial number Y813873 nga dunay marka nga "CSN"; usa ka yunit nga revolver nga walay serial number nga dunay tulo ka buok buhing bala; ug usa ka buok nga kolor asol nga cannister nga dunay marka nga mentos.
Mga nasampit nga mga ebidensiya gimarkahan ug giimbentaryo kon diin ang shabu dunay kinatibuk-ang gibug-aton nga 10.3 gramos nibalor sab og kinatibuk-ang P70,040. (Wenz G. Mendoza)