GISULTI ni Vice President Sara Duterte nga ang Office of the Vice President (OVP) nangayo og P733 milyones nga badyet alang sa 2026.
Gi-esplikar ni Duterte nga nagsumite sila og sugyot alang sa P733 milyones nga badyet, nga di kaayo layo gikan sa P700 milyones nga gialokar ngadto sa OVP alang sa 2025 badyet. Matud niya nga wala siya mosugyot og dako nga badyet tungod nagtuo siya nga dili kini aprobahan.
“Hindi nga kami ka alyado ng administrasyon at nakita na natin iyon noong nakaraang taon na siyempre kung hindi ka sumusunod hindi ka kaalyado ay hindi ka mabibigyan ng pondo para sa mga proyekto ng opisina mo,” tug-an niya atol sa 2025 OVP Pasidungog kagahapon, Lunes, Hunyo 16, 2025, sa SMX Convention Center, Lanang sa Davao City.
Dugang ni Duterte nga nihimo lang sila og gamay nga taas sa gipangayo nga badyet subay sa inflation, kay di siya buot nga ang mga personahe sa OVP maulawan ilabi na atol sa pagpatim-aw sa Kongreso ug sa Senado.
Giklaro niya nga ang OVP motambong gihapon sa budget panel; apan, ang buhatan wala pa makadawat og eskedyul alang sa bisan unsang pagdungog sa badyet. Iya sab nga gibutyag nga ang iyang buhatan nagpagawas og abiso bahin sa "unavailability" sa "burial assistance".
Dugang ni Duterte nga ipabilin sa OVP ang ilang mga programa alang sa 2025 ug wala na'y ipuno nga mga programa alang sa 2026. Pipila sa mga nagpadayon nga programa naglakip: "OVP are Pagbabago: A million learners and trees campaign, Magnegosyo ta day, You can be VP, Libreng Sakay, Rice Program, and Disaster Relief Operations".
Kahinumdoman nga nasugamak ang OVP og dakong pagpul-ong sa ilang badyet nga P1.3 bilyones sa 2025 General Appropriations Act. Sumala ni Ako Bicol Party-list Representative Zaldy Co nga ang "P1.3 billion cut will be reallocated and considered as augmentation" sa mga badyet sa Department of Social Welfare and Development (DSWD) ug sa Department of Health (DOH). (Rojean Grace G. Patumbon)