NAKASAKMIT ang mga awtoridad og P8.6 milyon nga kantidad sa ismagol nga mga yosi, uban ang gidudahan nga mga ilegal nga druga ug pusil, atol sa gilusad nga anti-smuggling operation gabii niadtong Hulyo 3, 2025, sa Barangay Ilang, Bunawan District, Davao City.
Ang hiniusang operasyon sa Purok 19, Cabanes Road resulta sa intelligence report gikan sa Naval Intelligence and Security Group-Eastern Mindanao (NISG-EM) bahin sa kadudahan, giabandona nga mga kahon duol sa usa ka bodega.
Sa paghiabot sa lugar, nadiskobrehan sa mga operatiba ang 431 ka master cases sa ilegal nga sigarilyo atubangan sa bodega nga giingong dunay kalambigitan sa suspek. Apil nga narekober gikan sa lugar mao ang duha ka sachets sa gidudahan nga shabu uban ang gibana-bana nga street value nga P5,000, ug usa ka .45 caliber Armscor pistol nga dunay pito ka mga buhing bala.
Ang suspek, 26-anyos nga si alyas Jumar, molupyo sa lugar, gitaho nga nakasibat sa mga awtoridad.
Ang operasyon hiniusang gilusad sa mga sakop gikan sa Police Station 4 (Sasa), pangulohan ni PCPT Arnieto R. Ico ug ilawom sa superbisyon ni PMAJ Marcille M. Manzano, uban sa NISG-EM pangulohan ni LCDR Melwin L. Goles, ug mga operatiba gikan sa Bunawan Police Station.
Kasamtangan, ang nasakmit nga mga yosi gitunol na ngadto s Bureau of Customs-Port of Davao alang sa tukmang dokumentasyon ug pag-andam og kaso. Samtang ang pusil ug mga ilegal nga druga ipailawom sa forensic examination sa Regional Forensic Unit (RFU-Davao) samtang ang
Bunawan Police Station kasamtangang nag-andam na og mga kaso batok sa nakasibat nga suspek. (David Ezra Francisquete)