DUHA ka mga high-value targets, kinsa gialegar nga drug pushers, nasikpaw sa hiniusang puwersa sa kapulisan sa Davao del Sur pinaagi sa drug bust sa Purok Perlas, Barangay Bato, Sta. Cruz, Davao del Sur, ala 1:23 sa kaadlawon niadtong Martes, Pebrero 18, 2025.
Ang mga suspek giingong gikan sa Midsayap, Cotabato Province nga gipang-ila nga sila alyas Nur, 27-anyos, ug alyas Sayed, 24-anyos.
Mga nahisgutan nadakpan pinaagi sa hiniusang mga operatiba sa Davao del Sur Provincial Office sa Philippine Drug Enforcement Agency (PDEA) Regional Office 11, Provincial Drug Enforcement Unit (PDEU) sa Davao del Sur Police Provincial Office, ug Sta. Cruz Municipal Police Station.
Nasignit ang mga suspek sa dihang nisulay og baligya og ilegal nga druga nga nikantidad og P40,000 ngadto sa usa ka poseur buyer nga sakop sa kapulisan, gamit ang marked money.
Dihang nabulabog, nabawi sab gikan sa mga dinakpan ang laing duha ka mga dagkong pakite sa gituohang shabu nga mitimbang og 103 gramos nga mikantidad og P864,000, lakip na ang gimarkahang buy-bust money nga nisumada tanan og P904,000.
Lakip sa nabawi gikan sa duruha ang usa ka behikulo nga gigamit sa ilegal nga transaksiyon.
Mga suspek gikustodiya sa Sta. Cruz Police Station ug pasakahan og kasong paglapas sa Republic Act 9165 kun Comprehensive Dangerous Drugs Act of 2002. (July Aubrey R. Ngo)