PORMAL nang gitunol sa kagamhanang probinsiyal sa Davao de Oro ang permanenteng yunit sa mga balay sa Sitio Patagan Resettlement Site sa Elizalde, Maco, Davao de Oro, ngadto sa mga pamilya nga naapektuhan sa landslide sa Masara.
Ang seremonya sa pagtunol, nahitabo niadtong Dominggo, Disyembre 8, 2024, nagtimaan sa usa ka mahinungdanon nga katikaran alang sa mga kanhi molupyo sa Kampo 1 Temporary Shelters sa Barangay Elizalde, kinsa nadislokar sa trahedya niadtong Pebrero 6, 2024.
Ang local government unit (LGU) nagsulti nga ang pagtunol sa permanente nga mga yunit sa balay naghulagway sa ilang pagkomitar sa pagseguro sa kaluwasan ug kaayohan sa komunidad.
Ang proyekto nahimong posible pinaagi sa hiniusang paningkamot nga naglambigit sa donasyong panalapi, kahago, ug mga materyales sa konstraksiyon.
Ang maong inisyatibo nga relokasyon maoy nag-unang lakang sa komprehensibong plano sa LGU nga suportahan ang katawhan sa Maco Davao de Oro.
Nipadayag og pasalamat si Governor Dorothy “Dotdot” Gonzaga ngadto sa mga ahensiya sa gobyerno ug pribadong mga hingtungdan kansang panaghiusa naghimo sa proyekto nga reyalidad.
“Dako kaayo'g importansiya ang panimalay, mao nga malipayon ko sa gipakita ninyo na suporta sa gobyerno,” pulong pa niya.
Nagpasalamat sab si Congressman Ruwel Peter Gonzaga sa District 2 ug nagpahimug-at sa kaimportante sa panagkunsabo og tukod-balik og mga kinabuhi.
“Ako malipayon ko nga sa isa ka higayon kabahin ko sa gobyerno, kabahin ko sa mga private stakeholders, kabahin ko sa empleyado sa gobyerno, kabahin ko sa pagpaningkamot ni Gov. Dot Dot nga mahimoan mo'g balay, og kamo ang sumbanan sa paglihok sa gobyerno alang kaninyo,” tataw pa niya.
Ang pagdahili sa yuta sa Barangay Masara, Maco, niadtong Pebrero 6, 2024, nikalas og 93 ka kinabuhi, kon diin 79 niini nailhan ug walo ang wa igkita.
Ang trahedya nilubong sa 62 ka balay, bus terminal, dyipney, ug ang Barangay Hall. Apan bisan pa sa trahedya, 32 ka mga indibiduwal ang naluwas, apil ang mga pasahero sa bus nga nanglukso.
Ang paghuman sa proyektong relokasyon nagsimbolo og bag-ong sinugdanan alang sa mga naluwas, nga naghanyag og paglaum ug kalig-on human ang destrosong hitabo. (Rojean Grace G. Patumbon)