ANG commander sa 10th Infantry Division sa Philippine Army nga si Major General Allan Hambala mihimakak nga gimandoan ni Presidential Assistant for Eastern Mindanao Leo Tereso Magno nga i-pull out ang iyang mga tropa sa Davao del Norte Sports Complex.
Mitumaw ang hungihong nga pull out pipila ka oras sa wala pa magsugod ang prayer rally nga kalihokan sa provincial sports complex Dominggo sa gabii, Abril 14, 2023.
Sa usa ka interbyu sa telepono, matud ni MGen. Hambala nga iyang desisyon nga i-reposition ang iyang tropa sa ikaduha ug ikatulo nga layer sa security plan ug dili sa mando o hangyo ni Sec. Magno ingon sa gihungihong.
Si MGen. Hambala niingon nga ang iyang mga tawo dili unta duol sa rally tungod kay ang kapulisan maoy gimanduan sa pagpatuman sa crowd control dungan sa pagsiguro sa mga manambong.
Matod niya nga desisyon niya nga i-reposition ang iyang mga tawo sa pagsusi sa lugar sayo sa adlaw’ng Dominggo.
Gikasubo ni Hambala ang mikatag nga fake news labi pa nga gikalambigitan kini sa mga nailhang personalidad.
Matud pa sa heneral nga nakig-estorya usab siya kang Davao del Norte Gov. Edwin Jubahib nga nagpatin-aw nganong nakahukom siya nga i-reposition ang tropa.
Ang buhatan sa Presidential Assistant for Eastern Mindanao nakatakdang mopagula og opisyal nga pamahayag. (Jeepy P. Compio)