MAS gipahugtan pa sa kapulisan sa Davao City Police Office (DCPO) ang seguridad sa mga tunghaan labi na nga sa Hunyo 16 magsugod na ang tingtungha 2025-2026.
Kini ang gibutyag ni DCPO spokesperson Police Captain Hazel Tuazon atol sa AFP-PNP Press Conference Huwebes, Hunyo 11, 2025.
“Ang atong mga station commanders nagahatag na sila og gidaghanon sa mga pulis sa mga eskuwelahan aron makahatag og seguridad sa mga estudyante,” ingon ni Captain Tuazon.
Gihangyo sab ni Tuazon ang mga ginikanan nga mosumbong dayon sa kapulisan ugaling dunay namatikdan ang ilang mga anak nga di maayo samtang naa sila sa eskuylahan.
Gipasabot sab ni Tuazon nga dali na lang kaayo karon ang pagpahibalo sa mga estudyante ngadto sa ilang mga ginikanan ugaling dunay mga dautan ug kadudahang mga lihok.
“Sa kanang seguridad labi na just in case naay mga concerns ilabi na nga naa pud mga ginikanan nagahatud sa mga bata, moduol lang sila sa atong mga police assistance desk nga gibutang sa mga station commanders,” sumpay ni Tuazon.
Giingon sab sa opisyal nga bastante ang ihap sa mga pulis nga ipang-deploy sa mga tunghaan sa pagbalik sa eskuwela. (Patricia Ann Reyes, Ateneo de Davao University - AB Communication Intern)