Pagbatok ASF sa Cotabato gipakusgan

Pagbatok ASF sa Cotabato gipakusgan
(Tampo nga hulagway)

KIDAPAWAN CITY -- Gipalig-on pa sa probinsiya sa Cotabato ang kampanya batok sa African Swine Fever (ASF) nga mikuyanap sa upat ka lungsod.

Kini mismo ang gikompirma ni Cotabato Provincial Advisory Council focal person on ASF Engineer Eliseo Mangliwan.

Mga lungsod nga naigo sa ASF mao ang Antipas diin apektado niini ang mga barangay sa Poblacion, Kiyaab, Malire, Datu Agud ug Magsaysay.

Sa Makilala nga naigo sab sa ASF, apektado nga mga barangay mao ang Bulakanon ug San Vicente.

Sa Pigcawayan, mao ang mga barangay sa New Panay ug Malagakit nga anaa sa ground zero, apil na ang President Roxas sa nahisgutang probinsiya.

Kasagaran nga apektado mao ang mga backyard hog raisers kinsa unang nitaho sa buhatan sa CPAC bahin sa pagkamatay sa mga baboy nga wala masayri nga positibo diay sa ASF.

Gisugyot ni Governor Emmylou Lala Taliño-Mendoza mao ang paggamit sa bag-ong mga teknolohiya aron mapadali ang pag-ila sa ASF, pagpalig-on sa ASF Incident Management Team (IMT), hugot nga pagpatuman sa "biosecurity measures", ug pagpakusog sa "information dissemination" sa mga komunidad sa tibuok probinsiya.

Sa kasamtangan, 24 oras nga gibantayan ang mga ASF checkpoint sa entry ug exit points sa Cotabato Province aron makunhoran ang pagkuyanap sa kagaw sa mga binuhing baboy. (EEF)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph