NAGHIKYAD ang Department of Education-Davao City (DepEd-Davao) ug ang lokal nga panggamhanan og mga plano sa pagtukod og dugang mga klasrom sa pampubliko nga tulunghaan aron nga matubag ang nagkadako nga kakuwang sa tibuok dakbayan.
Gikompirma ni DepEd-Davao City Schools Division Superintendent Reynante Solitario sa paghinabi sa usa ka radyo nga gipanag-iya sa gobyerno sayo ning semanaha nga ang panaghisgut uban ang lokal nga panggamhanan sa siyudad nagpadayon pinaagi sa Local School Board, ilabi na uban ni Mayor Sebastian "Baste" Duterte, aron nga makakita og solusyon sa kakuwang sa mga klasrom
Matud ni Solitario nga ang isyu apil sa mga butang nga gipasibaw atol sa bag-ohay pa lang nga “Parangal sa mga Atleta,” kon diin si acting mayor Duterte nanguna sa pag-ila sa mga outstanding student-athletes sa dakbayan. Iyang giangkon nga ang kasamtangan nga Special Education Fund di igo aron nga malakip ang mga panginahangalan sa klasrom alang sa dibisyon.
Gibutyag sa opisyal nga ang dakbayan nag-atubang og kakuwang nga 4,053 klasrom base sa standard ratio sa usa ka klasrom sa matag 30 ka mga tinun-an sa elementarya.
Hinuon nagpadayag siya og paglaum nga ang lokal nga panggamhanan sa di madugay mopatuman og programa ug mipasalig ang DepEd-Davao nga andam nga motunol og mga gikinahanglan nga dokumento alang sa pagtukod og dugang mga klasrom.
Si Mayor Duterte, atol sa iyang inagural nga pagpamulong, nagpahimug-at na sa kaimportante sa pagbubo sa edukasyon ug nisaad nga motubag sa inprastraktura ilabi na sa kakuwang sa mga klasrom.
Sukad Hulyo 3, ang enrolment sa pribado ug pampubliko nga tulunghaan sa Davao City pabilin naa sa ubos sa target, niabot lang og 91 porsiyento itandi sa niaging tuig tingtungha. Gitampo ni Solitario ang ubos nga ihap sa magtutungha sa pagbalhin niini ngadto sa ubang mga disbisyon, daghan niini naa pa sa proseso sa pagkuha sa ilang mga school records.
Bisan pa niini, iyang giklaro nga ang late enrollees padayon pang dawaton, bisan kung ang klase sa tulunghaan nagsugod na niadtong Hunyo 16.
Aron nga mahulipan ang limitado nga ihap sa mga klasrom, mga tulunghaan sa tibuok siyudad nagpatuman og shifting schedules. Gitaho sab ni Solitario nga ang 300 bag-ong teaching positions nabutangan ug gipakatag sa mga tulunghaan kon diin dugang mga personahe ang gikinahanglan. (David Ezra Francisquete)