NAGPABILIN nga matinud-anon ang Davao City Police Office (DCPO) sa ilang tahas sa pagbantay sa dakbayan uban ang katim-os, integridad, ug dedikasyon.
Kini pinaagi sa nahimong kalampusan sa DCPO sa bulan sa Hulyo 2025, ubos sa paggiya ni Acting City Director Police Colonel Mannan Muarip, sa ilang paningkamot sa paggukod sa kriminal sa dakbayan.
Ang kalampusan nahimong posible pinaagi sa way puas nga suporta ug lig-ong pakigtambabayong uban ang komunidad, mga opisyales sa barangay, ug sa lokal nga panggamhanan sa Davao (LGU), kon diin maoy testamento sa gahum sa hiniusang aksiyon sa pagmugna og mas luwas ug mas lig-ong seguridad sa Davao City.
Sa ilang way puas nga kampanya batok sa tanang matang sa kriminalidad nakalusad ang DCPO og 138 ka anti-drug operations nga niresulta sa pagkaaresto sa 172 ka mga indibiduwal ug pagkasakmit sa gibana-bana nga 354.5854 gramos sa shabu, 61.8612 gramos sa marijuana, ug 17 ka tableta sa ecstasy.
Ang kinatibuk-ang pagbana-bana sa street value sa mga nasakmit nga illegal nga druga nikantidad og P2,447,504.06.
Samtang kinatibuk-ang 181 ka drug related ka mga kaso ang napasaka ngadto sa hukmanan, nga nagdemonstrar sa lig-ong baruganan sa DCPO batok sa ilegal nga kalihukan sa druga.
Bahin sa kampanya batok sa ilegal nga sugal, moabot sa 50 ka operasyon ang nalusad sa kapulisan kon diin 18 ka mga indibiduwal ang nadakpan ug pagkasakmit sa pusta nga mokabat sa P15,062.
Ang maong mga operasyon niresulta sa pagpasaka og 50 ka asunto ngadto sa korte aron pangkaon ang pagkatap sa ilegal nga sugal sa nagkadaiyang mga komunidad sa dakbayan.
Nilampos sab ang DCPO sa ilang gipahugtan nga paggukod sa mga tawong pinangita sa balaod kon diin sa maong higayon 182 ka indibiduwal ang nasikop -- apil ang 66 ka mga most wanted persons ug 116 ka lain pang mga pinangita nga indibiduwal—nagpakita sa tinuod nga kakugi sa DCPO sa pagtuman sa ilang tahas aron nga dad-on ang mga pinangita ngadto sa hukmanan.
Samtang sa kampanya sab batok sa loose firearms, nakalusad ang DCPO og 23 ka operasyon nga niresulta sa pagkaaresto sa 14 ka indibiduwal ug nakasakmit og 16 sab ka mga pusil.
Dugang pa niini, 6 pa ka mga armas ang boluntaryong gisurender samtang 3 ang gitunol alang sa "safekeeping" ilawom sa Oplan Katok kon diin kinatibuk-ang 14 ka mga kaso nga dunay kalambigitan sa ilegal nga paghupot og armas ang gipasaka ngadto sa korte.
Gipahimug-atan sa DCPO ang kamahinungdanon sa malahutayong pakigtambayayong ug pagsalig tali sa mga pulis ug sa publiko.
Ang kalampusan sa mga operasyon sa DCPO di lang resulta sa paningkamot sa mga awtoridad, apan apil na sab ang aktibong pagpakabana sa komunidad, lideres sa barangay, ug LGU, kinsa padayon nga nahimong esensiyal nga kauban sa padayong pakig-away batok sa kriminalidad. (Wenz G. Mendoza)