NAGPADAYAG og kabalaka ang koalisyon sa mga politiko, lideres nga relihiyuso, ug mga grassroots organizations gikan sa Davao bahin sa Commission on Elections (Comelec) Resolution No. 11116, nag-awhag sa ahensiya nga irebiso ang resolusyon sa pagprotekta sa konstitusyonal nga mga katungod, ilabi na gyud ang katungod sa kagawasan sa pamahayag ug patas nga diskurso.
Ang pagsaway nasentro sa Seksiyon 2 sa resolusyon, nga posibleng magguba niining mga nag-unang mga katungod.
Ang resolusyon nga gipagawas sa Comelec, naglakip sa mga probisyones nga mahimong makalimitasyon sa kagawasan sa pamahayag, ilabi na sa konteksto sa election campaigns ug mga panaghisgut nga politikanhon.
Atol sa media forum giulohan og “To Tell the Truth is not Red-Tagging,” gipasiugdahan sa Kalinaw Southeastern Mindanao, Biyernes, Marso 7, 2025, ang organisasyon, gilangkuban sa mga kanhi rebelde nga nag-adbokasiya alang sa kalinaw ug panag-uli sa Davao Region, nagpahimug-at sa kabililhon sa kamatuoran.
Ang tigum nagpahimug-at nga samtang "red-tagging" posibleng peligro sa mga indibiduwal, ang pagsulti og kamatuoran di sama sa red-tagging.
Dugang gipahimug-atan niini nga ang pagyagyag sa subersibong mga grupo ug nagtawag og pagpangilad dili usa ka krimen apan nag-unang katungod.
Pipila sa mga naa sa aktibidad naglakip kang Bishop Wenceslao Molato sa Iglesia Filipina Independiente, Reverend Joyce Laroga sa United Church of Christ in the Philippines (UCCP-Bukidnon), Fellowship of Congregational Churches, ug Anita Rae Manalastas sa Youth for Peace Movement. Jayvee Tyron Uy, Vice Governor sa Davao de Oro, niduwa pud og papel sa maong kalihukan.
Si Arian Jane Ramos, presidente sa Kalinaw Southeastern Mindanao ug kanhi lider sa New People’s Army (NPA), nagpahimug-at sa kabililhon sa pagbantay sa kagawasan sa pahayag. Naila sa iyang pagka-alyas Marikit, si Ramos nagsilbing secretary sa Guerrilla Front 55 ilawom sa Southern Mindanao Regional Committee.
Namahayag siya bahin sa mga kalihukan sa organisasyon sa Paquibato District sa Davao City ug nagpadayag sab og kabalaka nga ang anti-government political groups, sama sa Gabriela Partylist, Kabataan Partylist, ug Act Teachers Partylist, nga iyang giangkon nga "affiliated" uban sa Communist Party of the Philippines (CPP), New People’s Army (NPA), ug National Democratic Front (NDF), o labing nailhan isip CPP-NPA-NDF nakasulod na sa nataran sa Kongreso, nga nihatag og dugang hulga ngado sa kagawasang demokratikanhon.
“Ang pagbabalik loob namin ay ang pagbabalik serbiyso sa mga tao para po sabihin kung ano ang katotohanan sa likod ng New People’s Army at ang kanyang koneksyon sa mga legal front organizations,” esplikar ni Ramos.
Niadtong Pebrero 28, si Ramos, uban sa tag-as nga kanhi opisyales sa dekada nang gidugayon nga communist guerrilla group sa Pilipinas, nagtubag sa mga nasudnong tigbalita ug nagsumite og suwat ngadto sa central office sa Palacio del Gobernador, Intramuros, Manila, naghangyo sa pag-amendar sa "anti-discriminatory and fair campaigning" nga mga sumbanan alang sa 2025.
Bisan tuod kon gidayeg sa grupo ang patas nga pagpangampanya alang sa bulnerable nga mga sektor, nabalaka sab sila bahin sa probisyon sa "labeling individuals as criminal or subversive" atol sa eleksiyon.
Gisupak nila nga kini nga restriksyon naglimita sa diskusyon sa mga grupo nga dunay kasaysayan nga nalambigit sa insurhensiya.
“The resolution disproportionately protects those claiming victimhood without considering that many of us—former rebels and victims—are also unfairly labeled when we speak out,” matud sa grupo. Gipahimug-atan nila ang ang "red-tagging" nagkuwang og ebidensiya ug ang ilang accounts nakabase sa buhing kasinatian.
Nabalaka sila nga ang han-ay sa mga pulong sa Comelec Resolution No. 11116 mahimong abusohan sa paggamit isip political weapon, aron nga pahilumon kadtong "accounts are dismissed by the same entities causing harm". Nagpahimangno sila nga mahimo king “disenfranchise real victims” ug mapakyas sa pagprotekta sa katakus ug gahum.
Giawhag sa grupo ang Comelec nga magtutok sa pagpalig-on sa "fact-checking, implementing a transparent grievance process, enforcing existing rules, and protecting vulnerable groups, including former rebels and insurgency victims actions." (David Ezra Francisquete)