DAVAO CITY -- Tinguha sa Department of Transportation (DOTr) ug Civil Aviation Authority of the Philippines (CAAP) nga matapos ang ekspansiyon sa Davao International Airport Passenger Terminal Building sa Disyembre 2026.
Ang proyekto, nga dunay badyet nga P650-milyon magpadako sa Passenger Terminal Building area gikan sa kasamtangan nga 17,500 kuwadrado metriko ngadto sa 25,910 kuwadrado metriko.
“Through the expansion, the PTB will be able to cater to and seat an additional 700 passengers, compared to a previous seating capacity of 1,500. Additional spaces for concessionaires will also be added, with the project projected to generate an estimated 4,000 jobs for the city,” mabasa sa pahayag sa CAAP sa nagpadayong proyekto.
Niadtong Hulyo 24, giinpeksiyon ni DOTr Secretary Vince Dizon kauban sila CAAP’s Deputy Director General for Administration Atty. Danjun Lucas ug DIA Airport Manager/CAAP Area 11 Acting Area Manager Rex Obcena ang proyekto nga nahimutang sa Sasa, Davao City.
Gisulti ni Sec. Dizon sa pakighinabi sa mga tigbalita nga dunay panginahanglan nga pauswagon ang pasilidad sa Davao airport tungod sa ihap sa mga pasahero nga ilang gialagaran.
Ang konstraksiyon sa gipadak-an nga inprastraktura gikinahanglan gyud kay ang Davao International Airport nga giablihan niadtong 2003 walay nahimong dako nga kausaban sukad niadto. Kini maoy ikatulong pinakadako nga tugpahanan sa Pilipinas kung hisgutan ang gidaghanon sa mga pasahero.
Atol sa 2019 una ang pandemya, nag-alagad ang tugpahanan og 4.5 milyon nga pasahero. Uban sa kasamtangna nga post-pandemic recovery, nagkataas ang ihap sa mga pasahero sa eroplano sa Davao nga sa di madugay masusama na o molabaw na ihap sa pre-pandemic. Niadtong Enero 2024 hangtud Oktubre 2024 ang tugpahanan nag-alagad og 3.5 milyon nga tigbiyahe.
Ang nagpadayon nga DIA infrastructure project nahisubay sa saad ni President Ferdinand R. Marcos Jr. nga mopatuman og mga infrastructure programs sa nasud kansang benepisyo mabati sa daghang mga Pilipino.
“Ang mga naglalakihang proyekto ay nakalatag sa buong kapuluan. Mga daan, tulay, tren, paliparan, pantalan, patubig, at murang pabahay. Ilan dito, matatapos ngayong Administrasyon na ito. Ang iba naman, makukumpleto pa at mararamdaman ang dalang ginhawa pagkatapos pa ng aking termino,” matud ni President Marcos atol sa bag-ohay pa niyang State of The Nation Address. (PR)