Pagpamanhig patay sa VM sa South Upi, escort gikondena

GIKONDENA ni South Upi Mayor Reynalbert Insular sa Maguindanao del Sur ang pagpamanhig patay sa iyang bise mayor alas 5:00 sa hapon, Biyernes, Agosto 2, 2024.

Sa maong insidente napatay si Vice Mayor Roldan Benito sa South Upi ug iyang close-in security escort nga si Weng Ramos.

Naangol sab ang asawa sa bise mayor nga si Analyn Benito, kapitana sa Brgy Pandan ug iyang anak nga si Joseph Mutia Benito, 11-anyos samtang naluwas si Kian Percy Benito, 13-anyos nga pulos nagpuyo sa Sitio Bahar, Barangay Pandan, South Upi sa maong probinsiya.

Gibutyag ni Maguindanao del Sur Police Provincial Office Director Colonel Roel Sermese nga sakay ang mga biktima sa pickup truck nga gimaneho ni Vice Mayor Benito sa Sitio Linao, Brgy. Pandan.

Apan kalit lang silang gibanhigan sa wala mailhing mga armadong lalaki gamit ang mga tag-as nga matang sa armas kinsa dali sab dayong niiktad paingon sa hilit nga dapit sa South Upi.

Patay on the spot si Vice Mayor Benito ug escort niini nga Ramos samtang nadala sa balay tambalanan si Kapitana Benito ug iyang anak.

Padayon pa nga gisubay sa kapulisan sa South Upi Municipal Police Station ang hitabo kung diin duna nay mga persons of interest nga ilang giimbestigahan. (Edgar E. Fuerzas)