Pagpamusil sa mag-amahan, pulis wala pay matumbok nga suspek

Pagpamusil sa mag-amahan, pulis wala pay matumbok nga suspek
Hulagway gikan sa Davao City Police Office

WALA pa’y matumbok nga suspek ang kapulisan sa Marilog Police Station sa pagpusil sa mag-amahan alas 4:40 Martes sa hapon, Enero 23, 2024 sa Sitio Lumundao, Barangay Marilog, Marilog District, Davao City.

Sa report, dead on arrival sa Isaac Robillo Hospital sa Calinan ang usa ka amahan samtang samdan ang 14-anyos nga anak niini nga babaye human sila gipamusil sa wa pa mailhing mamumuno.

Si Police Major Nelson Violan Jr., station commander sa Marilog PNP, nag-ila sa mga biktima nga sila Gil Peraales Paican, 32-anyos, ug ang anak niini nga 14-anyos.

Sa inisyal nga imbestigasyon, nasayran nga samtang naglingkod ang mga biktima gawas sa ilang balay, kalit silang gipamusil sa giingong nakasakay sa itom nga sakyanan.

Saysay sa testigo, ang maong sakyanan nakaparada sa atbang nga bahin sa balay sa mga biktima.

Tulo ka mga buto sa pusil ang nadunggan sa mga residente diin human sa panghitabo, ila na lang nakita ang mga biktima nga samdan.

Padayon nga nag-imbestiga ang Marilog Police Station sa motibo sa pagpamusil aron nga mailhan ang mga mamumuno.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph