NAGSUBO ang Davao del Sur Police Provincial Office (DSPPO) sa wala damha nga pagpanaw ni Patrolwoman Kay Remando Dumasig, 28-anyos, masaligan nga sakop sa Matanao Municipal Police Station.
Giingong namatay si Pat. Dumasig tungod sa aksidenteng pagbuto sa iyang pusil nga nahitabo alas 6:50 sa hapon niadtong Hulyo 11, 2025, sulod sa Female Quarter sa Matanao MPS, Purok Tahimik, Brgy. Poblacion, Matanao, Davao del Sur.
Sa gihimong inisyal nga imbestigasyon, nagbutyag nga si Pat. Dumasig nangandam unta sa giisyu niining armas de fuego - 9mm Girsan pistol nga dunay Serial No. T6368-22CK03370 - alang sa gilaumang pagpahigayon og buy-bust operation. Apan samtang nagkarga sa iyang pusil, nahulog kini ug gisulayan niya og sawo apan aksidente niyang nakaptan ang gatilyo sa pusil hinungdan sa pagbuto niini nga niresulta sa pagkaigo sa iyang ulo nga bahin.
Dali siyang gisapupo ug gihatud ngadto sa Medical Center of Digos Cooperative (MCDC) Hospital sa Digos City apan gideklara siyang patay bisan pa sa paningkamot sa mga niabag kaniya nga medical team.
Gihangyo ang Scene of the Crime Operatives (SOCO) nga molusad og subsob nga imbestigasyon sa insidente. Ang narekober nga service firearm naa na karon ilawom sa tukmang pagkustodiya isip kabahin sa nagpadayong imbestigasyon.
Si Police Colonel Leo T. Ajero, provincial director sa DSPPO, nipadangat na sa iyang pahisubo ngadto sa nahabiling pamilya ni Pat. Dumasig.
“The entire DSPPO family is grieving over the tragic loss of one of our own. Patrolwoman Dumasig served with dedication and passion. Her passing is a heartbreaking reminder of the risks our personnel face even during preparation. We extend our heartfelt sympathies and prayers to her family and loved ones in this very difficult time.”
Gipasalig sa Davao del Sur Police Provincial Office nga padayon kining magtunol sa tanang gikinahanglan nga suporta ug tabang ngadto sa pamilya ni Pat. Dumasig ug magseguro nga tukmang protocols ug imbestigasyon angay nga pagasundon. (Uban sa taho sa Davao del Sur Police Provincial Office)