Pagpatay sa balut vendor 'crime of passion' — DCPO

NAGPADAYON ang usa ka lawom nga imbestigasyon sa Tugbok Police Station sa kamatayon sa usa ka babaye kinsa gidunggab sa wa pa mailhing responsable sud sa balay niini alas 3 sa kaadlawon, Miyerkules, Disyembre 6, 2023 didto sa Alabama Street, Phase 3, Deca, Brgy. Tugbok Proper, Tugbok District Davao City.

Sa hulagway nga gipagula sa Davao City Police Office makita nga dunay mga dugo ang gihigdaan sa biktima sud sa iyang gipuy-an, kinsa human sa pagpangdunggab nakadagan pa ang biktima padung sa gawas, aron mangayo og pakitabang apan nahagba ug nakabsan kini sa kinabuhi.

Ang biktima mao si Edwina Namoc Manlapauz, 44-anyos, balut vendor ug nagpuyo sa nasampit nga dapit.

Subay sa report sa Tugbok PNP, nga pag-abot nila sa dapit, nahagba na ang biktima tunga sa kalsada sa subdivision.

Nakahiagom og upat ka mga samad dinunggaban sa likod ang biktima diin nakaplagan sab ang kitchen knife nga walay puluan nga nabulit og dugo nga maoy gigamit sa pagdunggab.

Sumala ni DCPO Spokesperson Police Captain Hazel Tuazon nga ‘crime of passion’ o kremin bunga sa naghinobrang kasuko ang hinungdan sa pagpatay diin ang suspek niini mao ang kapuyo kinsa gikustodiya na karon sa kapulisan sa Tugbok PNP.

Kapulisan sa Tugbok PNP blangko pa sa matudlong suspetsado sa kremin samtang ang patay nga lawas sa biktima naa na karon sa Angel Funeral Homes, Calinan, Davao City.