CRIME of passion ang tinan-aw sa kapulisan nga motibo sa pagpusil-patay sa pulis sa iyang karelasyon sa Palma Gil Street, Bo. Obrero sa Davao City pasado alas 11 sa gabii, Dominggo, Mayo 25, 2025.
Kini subay sa pagsaysay ni Sta. Ana Police Station commander Police Major Richeen Lagnayo human nga ilang napasaka kagahapon sa buntag, adlaw’ng Lunes ang kasong murder batok sa suspek nga usa ka Police Corporal, 36-anyos nga nadestino sa Ecoland Police Station, ubos sa Davao City Police Office (DCPO).
Kagahapon sab mipagula og pamahayag ang DCPO pinaagi sa Acting City Director Police Colonel Hansel Marantan diin subay sa pamahayag ang DCPO nagpadayon sa ilang gihimong imbestigasyon sa krimen ug nagpasidaan nga ang tanang personahe sa DCPO gipahinumdoman sa ilang gipanumpaan nga katungdanan sa pagsuporta sa balaod, pagserbisyo sa publiko nga may integridad, ug pagmentinar sa pinakataas nga sukdanan sa propesyonalismo.
Dugang pa sa pamahayag nga gitambagan sa City Director ang tanang commanders nga magsugod sa pag-evaluate sa coping mechanism sa matag personnel niini nga buhatan ug himuon kini nga usa sa mga nag-unang prayoridad.
Gipahimug-atan sab sa pamahayag sa DCPO ang gipahinumdom sa hepe sa Philippine National Police (PNP) nga “If no one is accountable, everyone is irresponsible.”
Gibutyag sab ni Major Lagnayo nga base sa imbestigasyon, adunay relasyon ang duruha human nga una na nga gireklamo ang suspek sa kapulisan tungod sa giingong pagpangulata niini.
Pagkahuman sa hitabo, niadto pa ang suspek sa balay sa iyang asawa sa Sandawa apan wala gipasulod human nga niangkon nga adunay nahimong salaod.
Misakay og taksi ang suspek ug nipadulong kini sa Barangay Cogon sa Digos City apan dangtan og pipila ka oras nitahan sa Digos City Police Station.
Dugang nasayran nga ang suspek mobalik na unta sa trabaho kagahapong adlawa, Lunes, sa Ecoland Police Station human nadestino sa BARMM sa nakalabay'ng eleksyon.
Ang suspek nagsaulog sa iyang adlaw’ng natawhan diin mao sab ang adlaw nga iyang gipusil-patay ang biktima nga 39-anyos nga negusyante.
Ang biktima nakaangkon og upat ka mga samad-pinusilan gamit ang 9mm pistol nga giisyu nga armas sa Philippine National Police.
Una niini, nakurat ang mga tawo sa Palma Gil Street, Brgy. 13-B, dihang nakadungog sila og mga buto sa armas ug pagkataud-taod usa ka babaye ang nigawas sa itom nga sakyanan nga nagkadugo ug nangayo’g tabang.
Nadala pa ang biktima sa Southern Philippine Medical Center (SPMC) apan nakabsan kini sa kinabuhi.
Gisulayan sa mga tigbalita nga makuha ang pamahayag sa suspek apan nidumili kini sa paghatag og pahayag.