KIDAPAWAN CITY -- Padayong gisuta sa mga awtoridad ang motibo sa pagpamanhig patay sa usa ka miyembro sa Moro Islamic Liberation Front (MILF) alas 4:00 sa hapon, Lunes, Hunyo 30, 2025, sa Special Geographic Area (SGA) sa Bangsamoro Autonomous Region in Muslim Mindanao (BARMM), kanhi sakop sa Pikit, Cotabato Province.
Giila ang biktima nga si Maldoy Alba, sakop sa129th Base Command sa Bangsamoro Islamic Armed Forces sa MILF ug nagpuyo sa Galakit, Pagalungan, Maguindanao del Sur.
Gibutyag ni Cotabato Police Provincial Office (CPPO) Director, Police Colonel GFilberto Tuzon nga sakay ang biktima sa iyang motorsiklo sa Sitio Saipon, Brgy. Gokotan, Malidegao sa SGA apan kalit lang nibutho ang wala mailhing mga armadong lalaki ug girapido kini.
Dali sab dayong nakaiktad ang mga suspek dala ang motorsiklo ni Alba kinsa nakabsan gilayon sa iyang kinabuhi human matusak-tusak ang iyang lawas sa mga bala sa M16 Armalite rifles.
Dunay gitumbok ang pamilya sa biktima nga grupo nga giingong maoy namanhig kang Alba apan gipailawom pa kini og makuting pagsusi sa kapulisan sa Pikit Municipal Police Station kung kini duna ba gayuy kalambigitan sa pagpatay sa biktima. (Edgar E. Fuerzas)