PADAYON ang lawom nga imbestigasyon sa kapulisan sa Davao City Police Office (DCPO) sa pagpusil sa retiradong pulis alas 7:20 sa gabii, Marso 27, 2025, sa Purok 24, Christ the King Street, Cawa-Cawa, Barangay Catalunan Pequeño, Davao City.
Sa taho sa DCPO, ang biktima mao si Nix, 49-anyos, retired member sa Philippine National Police, minyo ug nagpuyo sa Barangay Catalunan Pequeño, Davao City.
Nasayran sa inisyal nga imbestigasyon sa Talomo Police Station nga usa ka 20-anyos nga drayber, taga Cawa-Cawa, Barangay Catalunan Pequeño, ang nakakita sa hitabo.
Gisaysay niini nga sakay sa kolor itom nga motorsiklo ang duha ka mga suspek diin ang namusil mao ang back-rider pag-abot sa Christ the King Street.
Nakahimo pa sa paglikay ang biktima ug gisundan pa unta sa mga mamumuno apan nakamatikod ang duha ka suspetsado nga daghan nang mga tawo ang nakakita nila.
Gilayong gidala sa Seventh Day Adventist Hospital ug UniDav Hospital ang biktima apan gibalhin kini sa Davao Doctor's Hospital.
Nakahiagom og mga samad-pinusilan sa tiyan ug likod ang biktima suma ni Dr. James Mangaoil diin anaa na kini sa luwas nga kahimtang.
Usa ka parallel investigation ang gihimo sa Davao City Forensic Unit (DCFU)-Scene of the Crime Operatives (Soco) team uban sa Talomo PNP aron maila ang posibleng mga persons of interest sa krimen. (Jeepy P. Compio)