GIIMBESTIGAHAN karon sa Bunawan Police Station ang construction worker nga ilang gikustodiya human nga misulay'g pusil patay sa barangay kagawad Lunes sa buntag, Mayo 26, 2025, sa Tibungco, Davao City.
Sa report sa Davao City Police Office (DCPO), nakuha sa posisyon sa suspek nga si alyas Regor, 37-anyos, ang usa ka .38 nga revolver ug usa ka .45 nga pistola.
Subay sa inisyal nga imbestigasyon sa kapulisan sa Bunawan PNP nga pasakay na sa sakyanan ang biktima dihang kalit giduol sa suspek ug gipusil.
Apan pakyas nga mobuto ang pusil hinungdan nga nakabantay ang biktima ug napugngan ug nawahing ang pagbunlot og laing armas ang suspetsado.
Mibuto ang laing armas nga gibunlot sa suspek, apan, suwerteng walay naigo.
Gilayong gi-aresto sa kapulisan ang suspek kinsa residente ra sab sa Barangay Tibungco.
Nagpadayon ang imbestigasyon sa awtoridad sa panghitabo, apan, posibleng mag-atubang og kasong Attempted Murder ang suspek kinsa nakakustodiya karon sa Bunawan Police Station.
Wala mihatag og pamahayag ang suspek nganong nahimo niya ang pagsulay og pusil sa nahisgutang barangay kagawad. (Jeepy P. Compio)