KIDAPAWAN CITY -- Nagpadayon pa ang pakisusi sa mga awtoridad sa tinuod nga motibo sa pagpangrapido sa magparyente alas 3:05 sa hapon, Dominggo, Pebrero 9, 2025, sa Pikit, probinsiya sa Cotabato.
Sa maong insidente, usa kanila ang namatay nga si Bayan Pangulagoy samtang naluwas si Mohaimen Sansawi Pangulagoy.
Gibutyag ni Cotabato Police Provincial Office (CPPO) Director, Police Colonel Gilberto Tuzon nga sakay ang mga biktima sa motorsiklo sa Barangay Punol, Pikit, Cotabato aron unta mopalit og isda sa merkado publiko.
Apan pag-abot nila sa bakante nga luna gipaarkan sila sa wala mailhing mga armadong lalaki gamit ang M16 Armalite rifles.
Mga suspek dali sab nga misibat paingon sa hilit nga dapit sa Pikit.
Gisapupo si Bayan sa iyang paryente, inabagan sa nagpakabana nga mga molupyo sa maong dapit ug gihatud ngadto sa Cruzado Medical Hospital sa Pikit apan namatay gihapon gumikan sa mga samad sa iyang lawas nga naigo sa mga bala.
Gipalawman pa sa kapulisan sa Pikit Municipal Police Station ang imbestigasyon sa pagpamusil sa mga biktima. (Edgar E. Fuerzas)