Pagrapido sa pasahero sa taxi gisusi

Pagrapido sa pasahero sa taxi gisusi
DCPO

USA ka lawom nga imbestigasyon ang gihimo karon sa San Pedro Police Station sa gipusil-patay nga pasahero sa taxi kagahapon sa buntag, Miyerkules, Hunyo 19, 2024, gawas sa Chinese Cemetery sa Circumferential Road, Barangay 19-B - Poblacion, Davao City.

Sumala ni San Pedro Police Station 2, commander Police Major Michael Uyanguren nga padayon nilang giila ang biktima sanglit wala sila’y nakuha nga mga identification card (ID) sa lawas niini.

“Wala pa naila ang victim kay wala pud ta’y nakuha nga mga ID sa iyang lawas, ug nagpadayon atong imbestigasyon sa hitabo,” ingon ni Major Uyanguren nga nahinabi sa mga tigbalita sa crime scene.

Saysay sa drayber sa taxi nga nisakay ang biktima sa Ecoland Terminal, atubangan sa Hall of Justice, kinsa nagpahatud sa Ladislawa Subdivision sa Bacaca Road.

Pag-abot sa taxi atubangan sa Chinese Cemetery, gitaparan kini sa giingong riding-in tandem dayon gipaulanan og bala ang taxi punting sa biktima.

Daling gipadaplin sa drayber ang taxi ug nahunong sila sa daplin sa kalsada kilid sa sementeryo, diin ang biktima naligo na sa dugo samtang ang drayber nadaplisan sa bala sa tiyan.

Nakabsan sa kinabuhi ang biktima samtang ang drayber nasamdan sa tiyan.

“Subayon nato ni nga hitabo aron masuta nato ang motibo sa krimen,” dugang ni Uyanguren.

Nakig-coordinar na ang operator sa taxi sa San Pedro Police Station ug giatiman niini ang iyang drayber. (Jeepy P. Compio)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph