MALINAWON ang pagsaulog sa Adlaw sa mga Mamumuo (Labor Day) Miyerkules, Mayo 1, 2024, sa Davao City human nga way natalang mga krimen ug insidente sa mga kasamok.
Bisan pa sa gilusad nga protesta sa daghang mga walhong mga organisasyon ug unyon sa mga mamumuo sa rehiyon sa Freedom Park, Roxas Avenue, ang hapsay nga rali nahitabo tungod sa mga pulis, sundalo ug mga auxiliaries, sumala sa Davao City Police Office (DCPO).
Nihatag sab ang DCPO og 23 ka mga sakyanan isip kabahin sa ilang Libreng Sakay program aron nga matabangan ang nanginahanglan panahon sa emerhensiya ilabi na kadtong nisalmot sa maong kalihukan.
Base sa datus, mga 230 raliyesta ang nakig-alayon ug nisunod sa mga instruksiyon gikan sa mga awtoridad.
Mga organisasyon nga nisalmot mao ang Samahang Mangagawa sa Coca Cola-FCCU (SamaCoke-FCCU); Pepsi Cola Employees Workers Union (Pewu); Pilipinas Cable Corp.-Davao Employees Union (PCCDEU); Sky Cable; Davao Holcim Employees Workers Union (DHEWU); Holcim Davao Supervisory Independent Union (HDSIU); ug Pilipinas Cable Corp. Davao Employees Union (PCCDEU).
Ang ilang hiniusang panawagan mao ang paghapsay sa kahimtang sa mga mamumuong Pilipino, kon diin nag-awhag sa gobyerno nga tumanon ang ilang saad ug wagtangon ang kontraktuwalisasyon, pagtaas sa suholan, pagtapos sa giingong “anti-poor” nga transport modernization policy, ug ang nagkagrabe nga pag-atake "freedom of association" sa mga trabahante.
Ang Pilipinas dunay 50.5 milyon nga mamumuo sukad Disyembre 2023, kon diin kapin sa tunga niini nagtrabaho sa services sector (57.3 porsiyento), kapin kuwarter sa agriculture (24.4 porsiyento), ug ubos sa "fifth" sa industry (18.3 porsiyento). (David Ezra Francisquete)