HASOL kaayo ang magsuot og face mask, apan kinahanglan nga sundon ang mando sa gobyerno aron malikayan ang giingong pagkuyanap sa Monkeypox (Mpox) sa Davao Region.
Sumala sa usa ka inahan nga si Marlyn Gerodias nga hasol na kuno mag-face mask apan dili na bag-o sa katawhan nga magsuot niini sanglit kini ang naandam sud sa dul-an upat ka tuig nga panahon sa pagkuyanap sa Coronavirus Disease (Covid-19).
“For me, hasol kaayo kung mobalik ta og face mask, pero ok ra man pud kay nakasinati naman ta ato, so dili na ta mabag-ohan sa paggamit,” ingon ni Marlyn.
Human nga mibutho ang balita nga dunay mga kompirmadong nataptan og Mpox sa South Cotabato Province ug sa Digos City gilayong gipaigmat ang publiko.
Sayo sa buntag kagahapon, nagpagula og Executive Order 20 Series of 2025 si Davao del Sur Governor Yvonne Cagas nga mandatory sa mga residente ang pagsuot og face mask, isip kabahin sa strict observance of health protocols batok sa Mpox sa probinsiya.
Gipaabot sab sa Regional Trial Court (RTC)-11th Judicial Region ang mandatory nga pagsul-ob og face mask sulod sa Hall of Justice tungod sa hulga sa Mpox.
Sa memorandum nga gipagula ni Executive Judge Rowena M. Apao-Adlawan kagahapong adlawa, Mayo 29, 2025, giingon nga epektibo dayon, ang tanang empleyado, judges, kliyente, ug bisita sa Hall of Justice nga kinahanglan magsul-ob og face mask sa tanang oras samtang naa sa sulod sa korte.
Hugot sab nga ipatuman ang “No face mask, no entry” alang sa bisan kinsa nga mosulod sa maong gambalay.
Ang maong lakang kabahin sa preventive measures aron malikayan ang possible nga pagkuyanap sa infectious disease, subay sa Minimum Public Health Standards.
Gipahimangnoan ang tanan nga sundon kini sa istrikto nga paagi alang sa kasegurohan sa kahimsog sa publiko ug mga opisyal sa korte.
Sa pikas bahin, gibutyag sa Davao de Oro Provincial Health Office base sa Provincial Epidemiology and Surveillance Unit (PESU), nga dunay duha ka mga kompirmadong kaso sa Mpox sa Maco, Davao de Oro.
Nasayran usab nga usa sa nahisgutang mga kaso, fully recovered na samtang usa sab ang gisuspetsahang kaso sa Mpox ang giatiman sa Nabunturan.
Mga gideklarang mga kaso, gi-isolate na sa mga awtoridad, lakip na ang mga close contact sa mga pasyente aron malikayan ang pagkatap sa virus.
Pinaagi sa EO 40, Series of 2025, gimando sa Lokal nga Panggamhanan sa lungsod sa Compostela, Davao de Oro nga mosul-ob og face mask ang katawhan sa dapit aron nga hingpit nga mapatuman ang health protocols aron batukan ang pagkatag sa Mpox ingon man ang ubang makatakod nga mga sakit.
Lakip sa kamandoan ang pag-obliga sa katawhan nga mag-face mask sa mga pampubliko ug sirado (enclosed) nga lugar, kanunay nga pagpanghinaw, pag-report sa mga posibleng kaso ug kooperasyon sa tanan.
Samtang kagahapon sa udto, ang City Government of Davao mi-repost sa ilang naunang pahimangno labot Mpox niadtong Agosto 21, 2024.
Gisaysay ang mga impormasyon bahin sa Mpox nga angay’ng mahibaw-an sa publiko lakip na ang mga sintomas niini ug paunsa kini malikayan.
Nagpahimangno sab kung paunsa panalipdan ang kaugalingon ug ang tibuok pamilya batok sa sakit ug sayop nga impormasyon.
Kalabot niini, ang Philippine Red Cross nipagawas og health alert subay sa bag-ong kompirmadong kaso sa Mpox sa nasud, nga nag-awhag sa publiko nga magpabiling alerto ug molihok dayon kung adunay mga sintomas.
Gitambagan sa Red Cross ang mga na-expose o adunay sintomas nga mag-isolate sa balay ug tawagan ang Hotline 143 alang sa medikal nga giya. (Uban sa taho ni July Aubrey R. Ngo ug XFM 97.9)