GIBUTYAG sa manedyer sa Davao City Overland Transport Terminal (DCOTT) nga nilaum sila nga motaas ang ihap sa mga pasahero ngadto sa kapin 80,000 sa panahon alang sa kasaulogan sa Kadayawan Festival sunod bulan, Agosto 2025.
Matud ni Aisa Usop, manedyer sa DCOTT, nga ilang gilauman ang pagtaas sa mga pasahero sa maong gidaghanon itandi sa kasarangan nga average nga 35,000 hangtud 50,000.
Gisulti ni Usop nga ila sab nga gilauman nga ang ihap sa mga biyahe sa bus nga motaas gikan sa regular nga 700 ngadto sa 1,000 atol sa panahon sa kapiyestahan.
“We are expecting 80,000 passengers or more than 80,000 that is equivalent also sa atoang buses if we have 700 to 800 bus trips, that is equivalent to 1,000 or more than that,,” butyag niya atol sa ISpeak media forum Huwebes sa buntag, Hulyo 3, 2025, sa City Mayor’s Office (CMO).
Dugang pa niya nga makigkoordinar sila uban ang mga ahensiya sa gobyerno sama sa Land Transportation Office (LTO), Land Transportation Franchising and Regulatory Board (LTFRB), ug sa Southern Mindanao Bus Operators Association (SMBOA) por in kaso magkuwang sa mga bus tungod sa gilaumang pagdagsa sa mga pasahero.
Namahag sab si Usop nga nakigkoordinar na sab sila uban ang Davao City Police Office (DCPO) ug sa Public Safety and Security Office (PSSO) aron maseguro ang kaluwasan ug seguridad sa terminal atol sa maong panahon.
Alang sa pagpakatag sa impormasyon, tug-an niya nga ang terminal dunay "recorded" nga mga pahibalo sa iyang mga polisiya ug sumbanan, ilabi na sa pagtubag sa mga "concerns" sa mga pasahero.
Gitakda sa Davao City ang pagsaulog sa labing dako nga tinuig nga kalihukan, Kadayawan Festival, sa Agosto 2025. Ang festival mao ang kasaulogan sa pasalamat alang sa kabuhong nga ani ug pagtamod sa kaabunda sa kultura ug kabilin sa 13 ka lumadnong grupo sa dakbayan.
Pipila sa gipaabot nga aktibidad naglakip sa Floral Float Parade, Indak-Indak sa Kadayawan, Hiyas sa Kadayawan, trade fairs, ug exhibits.
Sa pikas bahin, mga pasahero sa Davao City Overland Transport Terminal (Dcott) makapahimulos na og libreng WiFi connection sa sulod sa terminal kay tinguha sa tagdumala nga mag-implementar niini karong bulana.
Gitug-an ni Dcott manager Usop, paghinabi uban sa Madayaw Program sa Davao City Disaster Radio, nga dugang sa pagpalambo nga giimplementar sa terminal mao ang libreng public WiFi alang sa mga pasahero.
“We’re going to have public WIFI internet diha sa atoang Dcott terminal. Hopefully next month makastart na ta it’s because ginapaningkamutan jud nato nga before Kadayawan nga naa na nang free wifi,” sumala niya.
Ang Dcott nakigkoordinar uban sa Department of Information and Communication Technology-Davao Region alang sa pag-instolar sa libre nga internet connection.
Gipaambit sab ni Usop nga laing mga kasilyas alang sa publiko ang itukod sa Southbound bay, kon diin makagamit ang publikop nga libre.
Alang sa dugang seguridad, dugang mga security cameras ang giinstolar aron nga makuha ang mga blind spots sa terminal.
Gipasalig ni Usop ngadto sa publiko nga ang tagdumala sa Dcott padayon sa pagpalambo sa ilang sistema ug serbisyo aron mahayahay ang mga tawo. (Rojean Grace G. Patumbon uban sa taho sa CIO-Davao)