AWAY sa illegal nga druga ang gilantaw sa mga awtoridad nga motibo sa pagpusil-patay sa usa ka babaye alas 7:15 sa buntag, Lunes, Enero 13, 2025, sa Cotabato City.
Giila ang biktima nga si Norhaya Samo Eto, 37-anyos, dalaga, ug nagpuyo sa Purok Ibrahim, Barangay Poblacion 8, Cotabato City.
Sumala kang Police Station 2 Commander Police Captain Teofisto Ferrer nga sakay ang biktima sa iyang motorsiklo sa Kakar Road sa Barangay Poblacion sa dakbayan.
Apan kalit lang nga mitunga ang riding in tandem suspects ug gipusil kini gamit ang kalibre .45 nga pistola kon diin mga suspek dali dayong nisibat paingon sa Maguindanao del Norte.
Patay gilayon si Eto nga nakaangkon og mga samad pinusilan sa ulo ug nawong.
Daghan ang nagtuo nga onsehan sa druga ang gilantaw nga hinungdan sa pagpatay sa biktima nga kanhi drug surrenderee.
Gilawman pa sa kapulisan ang imbestigasyon sa maong hitabo. (Edgar E. Fuerzas)