Pagtipi sa kagawad gituohang bikil

PERSONAL nga bikil ang usa sa mga motibo nga gilantaw sa kamatayon sa brgy. kagawad kinsa gipusil sa wala mailhing suspek sa Purok Pine Tree, Barangay Magugpo North, Tagum City ala 1:25 sa kaadlawon, Hunyo 13, 2025.

Ang biktima naila sa pangalang si Jorge Hinacay Josol, Jr., 45-anyos, minyo ug molupyo sa Purok Pine Tree, Barangay Magugpo North.

Kahinumdoman nga ang biktima gipusil sa wala mailhing armado samtang padung nga mosakay sa nakaparada niyang Toyota Hilux nga dunay plaka nga ZAC 3470 sa dalan sa Purok Pine Tree, Brgy. Magugpo North.

Matud pa nga kalit lamang nihunong sa nahimutangan sa biktima ang wa mailhing suspek ug sa wa’y daghang istorya gipusil siya sa dihang padung na mosakay sa iyang sakyanan.

Sumala pa nga nakahimo pa ang biktima sa paggawas agi sa pikas pultahan sa sakyanan apan giingong nahagbong kini sa creek ug gumikan sa mga samad nga naangkon, namatay kini.

Samtang ang suspek human sa gihimong pagpamusil, daling nikagiw paingon sa wala masayring direksiyon.

Narekober gikan sa crime scene ang unom ka nga mga basiyo, usa ka balinis sa bala sa gituohang kalibre .45 nga pistola, usa ka yunit nga Realme android phone, driver license, digital watch, antipara, yawe sa sakyanan ug bracelet.

Patay’ng lawas sa biktima gidala sa Tagum Cooperative Funecare aron nga hayaon. (Dexter T. Visitacion)