Pagtipi sa kawani sa LTO-BARMM gisubay

Pagtipi sa kawani sa LTO-BARMM gisubay
Pinaambit ni Randy Patches

KIDAPAWAN CITY -- Gisubay pa sa mga awtoridad ang pagpusil-patay sa operation liason officer sa Land Transportation Office sa Bangsamoro Autonomous Region in Muslim Mindanao (LTO-BARMM) alas 4:05 sa hapon, Lunes, Hulyo 1, 2024, sa siyudad.

Gikanayon ni Kidapawan City Chief of Police, Lieutenant Colonel Dominador Palgan Jr. nga ang biktima nga si Narris Maon, nagpuyo sa Barangay Lanao sa nahisgutang siyudad, gipusil sa mga wala mailhing lalaki samtang nagmaneho sa iyang sakyanan sa national highway sa Barangay Balindog sa maong siyudad.

Mga suspek daling nisibat sakay sa motorsiklo nga walay plaka paingon sa direksiyon sa Matalam, Cotabato Province.

Nibangga ang kotse sa biktima sa nakaparada nga dump truck daplin sa kalsada sa dihang wala na niya makontrola ang sakyanan human maigo sa ulo ug namatay.

Di pa matino kung aktibo pa ang biktima nga empleyado sa LTO-BARMM base sa nakuhang ID sa iyang kotse.

Sa pagsuwat sa balita, padayon pa ang imbestigasyon sa Kidapawan City Police Station sa maong hitabo. (EEF)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph