AWAY sa gidiling druga ang gilantaw sa mga awtoridad sa pagpamusil patay sa mag-agaw alas 2:25 sa hapon, Sabado, Hulyo 26, 2025, sa dakbayan.
Giila ang mga biktima nga mao sila Aminudin Mohammad, 33-anyos, minyo, construction worker, molupyo sa Barangay Rosary Heights Mother, ug Hassanul Ibrahimm, 25-anyos, ulitawo, ug nagpuyo sa Barangay Rosary Heights 13, Cotabato City.
Gibutyag ni Cotabato City Police Office (CCPO) Director, Police Colonel Jibin Bongcayao nga samtang nagtindog ang mga biktima kilid sa kalsada og dunay gihulat sa Purok Mabagel, Sitio Pagalunagan, Bagua 1 sa dakbayan.
Apan kalit lang nibutho ang duha ka wala mailhing tawo ug gipamusil sila gamit ang kalibre .45 nga pistola ug dayong sibat sakay sa motorsiklo paingon sa hilit nga dapit sa siyudad.
Patay gilayon ang mga biktima nga pulos nakaangkon og mga samad pinusilan sa ilang ulo ug dughan.
Narekober sab sa mga pulis ang mga drug paraphernalia gikan sa posisyon sa mga biktima.
Giimbestigahan na sa kapulisan sa Cotabato City ang pagpamusil patay sa mag-agaw.
Sa pikas bahin, gisurender ngadto sa kapulisan ang 200 ka mga tag-as nga matang sa armas alas 11:00 sa buntag, Sabado, Hulyo 26, sa Maguindanao del Sur.
Mga armas nagagikan sa 287 ka barangay sa 24 ka lungsod sa Maguindanao del Sur.
Ang pagpresenta sa mga armas dungan sa gipahigayon nga 1st Barangay Peace Summit PNP Provincial Headquarters, Camp Datu Akilan Ampatuan, Shariff Aguak sa probinsiya.
Ang programa gipangulohan ni Maguindanao del Sur Police Provincial Office (MDSPPO) Director Police Colonel Sultan Salman Sapal.
Matud ni Sapal, ang pagsurender sa mga armas nahimo pinaagi sa tabang sa aktibong koordinasyon sa mga Barangay Local Government Units, partikular na sa mga kapitanes sa matag lungsod.
Gipadayag usab ni Sapal ang iyang dakong pasalamat ngadto sa tanang barangay chairmen nga misalmot sa pagpatuman sa 1st Barangay Peace Summit nga matud niya importanteng lakang ngadto sa malungtarong kalinaw sa probinsiya. (Edgar E. Fuerzas)