DAVAO DEL NORTE -- Personal nga bikil ang gitumbok sa mga awtoridad nga hinungdan sa pagtodas sa security guard sa Purok Lanzones, Km. 61, Barangay Pandapan, siyudad sa Tagum alas 8:40 sa buntag, Marso 11, 2024.
Ang biktima giila nga si Ranilo Libradilla Nisnisan, 44, minyo, sekyu ilawom sa Makabayan 97 Security Agency, nadestino sa usa ka dakong mall sa nahisgutang dakbayan ug molupyo sa Purok 8, Barangay Mipangi, Nabunturan, Davao de Oro.
Base sa inisyal nga imbestigasyon sa kapulisan sa Tagum City Police Station, nasayran nga ang biktima naglabigar sa highway gikan sa probinsiya sa Davao de Oro paingon sa direksiyon sa siyudad sa Tagum, apan pag-abot niini sa lugar nga nahitaboan, usa ka wala mailhing armado nga lalaki ang kalit nga nibutho ug dayong pusil sa makadaghang higayon sa biktima tumong sa nagkadaiyang parte sa lawas, hinungdan sa hinanali niining kamatayon.
Human sa pagpamusil, ang suspek nagdaling nikagiw paingon sa wala masayring direksiyon.
Narekober gikan sa crime scene ang upat ka basiyo ug tulo ka balinis sa bala gikan sa gituohang kalibre .45 nga pistola.
Gawas sa motibong personal nga bikil, gisubay sab ang laing mga anggulo nga posibleng hinungdan sa pagpatay sa biktima.
Gilusad na ang hot pursuit operation sa kapulisan sa Tagum City police aron madakpan ang suspek ug pasakaan og kaso. (Dexter T. Visitacion)