DAVAO DEL NORTE -- Padayon pa nga gisusi ang posibleng motibo nga nagpaluyo sa kamatayon sa 72 anyos nga biyuda sa Purok 2 Danao, Barangay Datu Balong, San Isidro.
Gibutyag nga ang biktima nga si Elpidea Tungal, biyuda, ug molupyo sa nahisgutang dapit, napalgan sa iyang anak nga naligo sa kaugalingong dugo sulod sa ilang pinuy-anan.
Matud pa nga alas 6:30 sa gabii, Miyerkules, dihang ang anak babaye sa biktima mipauli sa ilang balay, maoy unang misugat sa panan-aw niini ang giingong lalaki nga nagdaling migawas gikan sa ilang balay nga nagbitbit og sundang ug midagan palayo sa wala masayring direksiyon.
Sumala pa nga sa pagsulod sa anak sa ilang balay maoy nakita ang biktima nga iyang inahan nga nagbuy-od sa salog samtang naligo sa kaugalingong dugo ug nakahiagom og daghang mga samad tinigbasan sa lawas.
Gitaho gilayon sa anak ngadto sa personahe sa Revitalized-Pulis Sa Barangay (RPSB–Datu Balong Cluster) ug ang biktima gidali pagdala ngadto sa Davao Regional Hospital pinaagi sa SIMERS sa pamasin nga masalbar pa ang iyang kinabuhi apan gideklarang dead on arrival sa doktor nga mihiling kaniya.
Patay’ng lawas sa biktima gilamayan na sa iyang pamilya ug mga kabanay. (Dexter T. Visitacion)