Pakistani nalambigit sa disgrasya

NADALA sa balay tambalanan ang usa ka lalaki human sa nahitabong bangga nga naglambigit sa Pakistani alas 4:50 sa hapon niadtong Agosto 19, 2024 sa Digos City, Davao del Sur.

Ang bangga giingong nahitabo sa interseksiyon sa Davao-Makar Road ug Aurora Street, Barangay San Jose, Digos City nga naglambigit sa Yamaha nga motorsiklo nga dunay plaka LA 74080, narehistro sa pangalang Hilson A. Ladesa ug sa SUV Jetour nga dunay plaka numero MBF 9980 ubos sa narehistrong pangalang Reizel Cabal Canas ug gimaneho sa usa ka Pakistani.

Sa gihimong imbestigasyon, nasayran nga ang motorsiklo naglabigar sa Davao-Makar Road padulong sa poblacion sa Digos City samtang ang SUV naglabigar sa Aurora Extension padulong sa Aurora Street sa maong siyudad.

Apan pag-abot sa nahisgutang lugar, giingong ang motorsiklo ug SUV wala mimenor sa interseksiyon hinungdan nga nagkabangga nga nresulta sa pagkaangol sa drayber sa motorsiklo nga si alyas Son.

Tungod sa impak, nahagba si alyas Son sa dalan ug nakaangkon og angol sa walang batiis ug gidali paghatud ngadto sa Davao Sur Provincial Hospital (DSPH) sa nagrespondeng mga personahe sa City Disaster Risk Reduction and Management Center (CDRRMC) aron katambalan.

Samtang ang motorsiklo ug sakyanan nakaangkon sab og di pa matino nga pagkadaut. (Wenz G. Mendoza)