UBOS ang ihap sa mga kabataaan nga nagpahimulos sa bakuna tungod sa pagpanagana, bisan sa gipakusgan nga School-Based Immunization (SBI) program sa dakbayan.
Gikanayon ni Dr. Analiza S. Malubay, National Immunization Program City coordinator, nga daghang mga ginikanan nagduha-duha pa kung tugtan ang ilang mga anak nga modawat sa ilang mga bakuna tungod sa pagpanagana sa bakuna.
Dugang pa niya nga dunay ubang mga ginikanan nagtuo sa mga "fake news" nga gi-post sa nagkadaiyang social media platforms.
Gisulti ni Malubay nga ilang pakusgan ang ilang information drive ug iseguro nga ang impormasyon nga ipaambit nila tinuod.
Matud niya nga ang barangay health workers makatampo pinaagi sa pagpakatag sa sakto nga impormasyon, kay naa sila sa barangay.
Giesplikar ni Dr. Joy A. Espina, DHO Talomo North ug Child Health City coordinator, nga ang uban rason sa mga ginikanan nga wa tugti ang ilang mga anak nga mabakunahan, naglakip sa pagtuo nga human na sila bakunahi sa dihang mas mga bata pa.
“Wala nila nakita nga nagahatag ta og booster kay ang bakuna nato nagababa ang immunity as time goes by,” pag-esplikar niya atol sa ISpeak media forum, Huwebes sa buntag, Enero 16, 2025, sa City Mayor’s Office (CMO).
Gitin-aw ni Espina nga di na kini bag-o nga mga bakuna; hagbay na silang naghatag niini ngadto sa mga kabataan sa dugay nang panahon, ug napruybahan na nga luwas ug epektibo kini.
Alang sa 1st Health Congressional District, tinguha nilang makabakuna og 9,378 ka Grade 1 nga tinun-an; apan, niabot lang sila og 3,041, kapareho og 42 porsiyento alang tipdas ug rubella, apil na ang tetanus ug diphtheria.
Alang sa Grade 4 nga mga tinun-an, ilang target nga bakunahan naa sa 4,561 ka mga babaye alang sa "human papillomavirus" (HPV) vaccine, apan 1,410 lang ka mga tinun-an ang nakakuha niini, nga kapareho sa 31 porsiyento.
Ang target alang sa Grade 7 nga mga tinun-an nga mabakunahan sa tipdas ug rubella, apil na tetanus ug diphtheria, naa sa 10,796, apan ang nabakunahan niabot lang og 3,829, o 35 porsiyento.
Sa 2nd Health Congressional District, ang kinatibuk-ang target alang sa Grade 1 nga mga tinun-an naa sa 10,255, apan 4,228, o 41 porsiyento ang naabot.
Alang sa mga babaye sa Grade 4 nga mga tinun-an, ang target naa sa 5,091, apan 1,680 ang nikuha, o 33 porsiyento alang sa HPV vaccination.
Sa Grade 7 nga mga tinun-an, ang target naa sa 9,219 alang sa tipdas ug rubella, apil na ang tetanus ug diphtheria, apan 3,117 lang ang nahatagan.
Sa 3rd Health Congressional District, ang target naa sa 11,182, apan 5,091 lang ang nipahimulos niini, nga gihubad ngadto sa 46 porsiyento.
Mga 5,560 babaye nga Grade 4 nga mga tinun-an mao ang target, apan 2,234, o 40 porsiyento lang ang nahatagan. Ang kinatibuk-ang target alang sa Grade 7 nga mga tinun-an naa sa 11,075 alang sa tipdas ug rubella, apil ang tetanus ug diphtheria, apan niabot lang og 5,128, o 46 porsiyento ang nahatagan.
Sa kinatibuk-an, alang sa Grade 1 nga mga tinun-an, ang target naa sa 30,795, apan niabot lang og 12,360, o 40 porsiyento ang nabakunahan.
Alang sa mga babaye nga Grade 4 nga tinun-an, ang target naa sa 15,212, apan niabot lang sila og 5,324, o 25 porsiyento ang nabakuhanan.
Alang sa Grade 7 nga mga tinun-an, target naa sa 31,090, apan niabot lang og 12,127, o 39 porsiyento ang nahatagan alang sa tipdas ug rubella, apil na ang tetanus ug diphtheria.
Gipadayag ni Malubay nga kini nga target kab-oton unta gikan sa Septyembre hangtud Disyembre 2024; apan, ang gidaghanon sa mga tinun-an ubos kaayo, busa ang target gilugwayan sa Enero 2025.
Kini nga "low turnout rate" nihatud ngadto sa paglusad og subsob nga pamakuna sa mga malls aron nga maabot ang mga tinun-an kinsa wala pa mabakunahi.
Matud niya nga ang ilang buhatan tinguha nga makakab-ot og 95 porsiyento nga vaccination rate aron nga makuha ang gitinguha nga "herd immunity" alang niining vaccine-preventable diseases.
Iyang giawhag ang mga ginikanan sa mga tinun-an sa Grades 1, 4, ug 7 nga tugtan ang ilang mga anak nga makadawat sa ilang bakuna, ilabi na kadtong na-enrol sa pribadong mga tulunghaan kinsa way "access" alang kanila.
Subli niyang gipasalig sa mga ginikanan nga di sila mabalaka, kay mga bakuna libre.
Kadtong buot nga mopahimulos sa ilang mga bakuna, naa silay pagbakuna sa Ayala Malls Abreeza sa Enero 18-19 ug 25-26; GMall Bajada sa Enero 21; SM Lanang sa Enero 23-24; ug flu vaccines naa usab, apan limitado lang.
Kung ang mall vaccination di magmalampuson sa pag-abot sa nahabiling mga tinun-an, ang DHO makigkoordinar sa Department of Education (DepEd) sa pagsulti sa mga ginikanan atol sa unang Parent-Teacher General Assembly sa school year 2025 aron pahibaw-on sila bahin sa kaimportante sa pagtugot sa ilang mga anak nga mabakunahan.
Sumala ni Espina nga gawas sa pagpakigkoordinar uban sa DepEd, nagtinguha sab sila nga makig-abin uban ang mga opisyales sa barangay ug purok leaders nga dasigon ang ilang mga konstituwente nga modawat sa mga bakuna. (Rojean Grace G. Patumbon)