Pamilya natabunan sa landslide

Tulay nahugno sab, 1 patay; daghan angol
Pamilya natabunan sa landslide
HULAGWAY gikan sa LGU-Kapalong

DAVAO REGION — Gikompirma sa kagamhanang probinsiyal sa Davao del Norte (PLGU-Davao del Norte) nga mokabat sa lima ka indibiduwal ang namatay sa managlahi nga pagdahili sa yuta ug mga insidente sa pagbaha nga natala sa munisipyo sa Kapalong sa maong probinsiya sayo ning semanaha. 

Sa maong namatay, upat niini mga miyembro sa pamilya kinsa gitaho nga nangatulog samtang ang maong trahedya nahitabo niadtong Huwebes  sa gabii, Pebrero 1, karong tuiga. 

Hinuon, naugkat na ang mga biktima sa Municipal Disaster Risk Reduction and Management Council sa Kapalong (MDRRMC-Kapalong) uban ang mga personahe sa Kapalong Rescue Emergency Services (KARES), Bureau of Fire Protection-Kapalong (BFP-Kapalong) ug mga opisyales sa Barangay Gupitan.

Ang ilang intesibong search and rescue operation sa lugar nagsugod niadtong Biyernes sa buntag sa Pebrero 2 ug malampuson nga natapos sa hapon sa samang adlaw. 

Mga patay nga lawas narekober giila nga sila Julius Loon, 45-anyos; Josie Loon, 48-anyos; Jeannifer Loon, 14-anyos, ug Jamaica Loon, 11-anyos ug mga molupyo sa Sitio Awod, Barangay Gupitan.

Sa pagsuwat ning balita, ang local government unit sa Kapalong (LGU-Kapalong) niabag na sa haya sa mga biktima samtang ang ilang patay nga lawas kasamtangan nga naa sa purenarya. 

Sa pikas bahin, ang MDDRMC sa maong lungsod nakatala og usa ka patay nga lawas niadtong Pebrero 4, human kini gitaho nga nawala sa dihang nahugno ang "hanging bridge" sa Purok 2 Taguango, Barangay Sua-on.

Atol sa search, retrieval, and rescue operation, ang biktima giila nga si Castillo Adot (wa masayri ang edad) kinsa wa madugay nakita sa Purok 1 Florida, pipila ka metros kon asa ang tulay nahugno. 

Sa imbestigasyon, kapin sa 35 ka indibiduwal ang nalambigit sa insidente ug daghan ang mga tawo nga naangol. 

Sa wala pa ang hitabo, ang Barangay Captain sa Sua-on nagpahimangno na sa iyang mga molupyo nga likayan ang paggamit sa maong tulay kung mobiyahe ug magdala ug pagkaon ug mga serbisyo tungod kay huyang na ang pundasyon ug uban pang mga materyales. 

Ang padayon nga pag-ulan bag-ohay lang dala sa Low Pressure Area maoy hinungdan sa pagbaha ug pagdahili sa yuta kasagaran sa mga probinsiya sa Davao Oriental, Davao de Oro, Davao del Norte ug Davao City.

Apan sumala ni Office of Civil Defense-Davao Region (OCD-Davao) Regional Director Ednar G. Dayanghirang, ang Davao del Norte maoy naay pinakadaghang ihap sa mga indibiduwal ug pamilya ang naapektuhan nga moabot sa kapin 32,000 pamilya sa pagsuwat ning balita. 

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph