GITAHO sa Securities and Exchange Commission-Davao City (SEC-Davao) nga nakadawat sila og 11 investment-related nga reklamo gikan Enero hangtud Hunyo 2025 sa tibuok Davao Region.
Gikanayon ni Atty. Katrina Jamilla Ponco-Estares sa SEC-Davao nga isip dugang sa maong mga kaso, ang buhatan nakatala sab og 77 ka mga reklamo may kabahin sa ilegal nga "lending and financing" nga kalihukan atol sa samang panahon.
“More on online ang mga scams anyone at mostly hindi registered sa SEC at mostly online lang,” tug-an ni Estares atol sa business forum niadtong Biyernes, Hunyo 20, 2025, sa NCC VP.
Gitin-aw ni Estares nga mga biktima nidangop sa ilang buhatan ug nangayo og giya, ilabi na kung magsugod na og panghuraw kanila ang mga mangingilad. Ang ihap sa mga reklamo karong tuiga, dugang pa niya, sama sa gidaghanon nga gitaho niadtong 2024.
Gihimo na ang mga imbestigasyon ug ang mga "findings" gisumite na ngadto sa SEC’s national office. Apan, esplikar ni Estares nga ang pag-ila ug pagsubay sa mga mangingilad nagpabiling lisud tungod kasagaran niini naglihok nga way mga buhatan ug nagsalig lang sa mobile wallet apps sama sa GCash ug PayMaya.
Ang pagpasaka og pormal nga kaso mahagiton kaayo kung ang mga biktima di mopatim-aw isip mga nagreklamo.
Padayon ang SEC-Davao sa pagpahimangno sa publiko batok sa paglambigit sa mga suspetsoso nga online lending ug investment nga naghanyag, ilabi sa nagkatag sa social media. Matud ni Estares nga uban sa mga pamaagi maglimbong sa mga indibiduwal pinaagi sa pagsaad og hulam o loans, nga magsingil og bayad una pa ipagawas ang bisan unsang pundo.
Iyang gidasig ang publiko nga magpabiling mainampingon ug di mosalig sa tanan nilang makita sa sa online. Una makig-transak sa bisan kinsa nga tigpahulam, kinahanglan nga susihon una ang ilang accreditation pinaagi sa official SEC website.
Aron nga maprotektahan ang mga konsumante, nagpagawas ang SEC-Davao og daghang mga abiso ug aktibong nakig-koordinar uban ang local government units (LGUs) sa Davao Region aron nga mapalambo pa ang pagmonitor ug masanta ang pagkuyanap sa pangilad sa online. (Rojean Grace G. Patumbon)