GITIN-AW ni Vice President Sara Duterte ang iyang pahayag bahin sa buot niya og “bloodbath” nga dunay kalambigitan sa iyang impeachment trial, ug nagsulti nga nagpasabot kini sa iyang kaugalingong dugo.
“And if it’s a persecution, it’s some sort of crucifixion against me. And so when there’s a crucifixion, there’s blood. So it’s a bloodbath. My bloodbath. So, I’m just sad that many people refuse to understand the contact wherein I give statement,” matud niya sa paghinabi kaniya sa mga tigbalita niadtong Mayo 31, 2025, sa Laan van Reagan en Gorbatjov Park sa The Hague.
Gi-esplikar ni Duterte nga daghang mga tawo wala makasabot sa gigamit niyang pulong nga "bloodbath." Matud niya nga daghan ang di gustong makasabot sa iyang pahayag ug nag-insister nga ang impeachment usa ka "political persecution". Sumala niya, kini ang paagi sa administrasyon sa paggukod kaniya aron nga moluwat gikan sa gabinete.
Kahinumdoman, unang nihimo sa pahayag si Sara bahin sa kaandam niini alang sa “bloodbath” niadtong Mayo 17, human ang Misa Pasalamat sa Carmelite Church sa Davao City.
Gisulti sa Vice President nga ang publiko makalaum sa iyang defense team nga mohimo sa ilang makaya sa pagprotekta sa iyang mga katungod nga ilang giakusa sa iyang impeachment trial. Dugang niya nga ganiron nila og tubag ang tanang alegasyon ug akusasyon, ug nangandam na sila alang sa bista sukad pa 2023.
Hinuon gisulti ni Duterte wala kaayo mobati og kabalaka bahin sa impeachment mismo, kay iya na kining nasayran sayo pa niadtong Nobyembre 2023. Iyang gipaambit nga ang iyang giandaman mao ang pagseguro nga makatulog siya og walo ka oras ug makainom sa iyang bitamina nga girekomendar sa iyang mga doktor.
Giklaro niya nga wala siya maglaum nga makadawat og makiangayon nga pagtaral, kay dunay mga pagsulay nga mamunit og mga ebidensiya atol sa pagdungog sa badyet. Sa dihang way nakuha nga ebidensiya, matud niya, nipadayon ang administrasyon sa imbestigasyon nga "in aid of legislation" sa confidential funds. Iyang giklaro nga ang Office of the Vice President (OVP) lang ang giimbitahan aron mobutyag bahin sa maong butang.
Iyang gihulagway nga ang nahitabo sa staff sa OVP, nga sila gihulga atol sa imbestigasyon. Apan bisan niadto, wala gihapon sila makakuha og ebidensiya, tulo ka mga articles of impeachment ang giduso nga walay saktong pamaagi.
Gikuwestiyon sab niini ang pagsusi sa 300 ka mga pirma nga gitahong natigum gikan sa mga miyembro sa House of Representatives sulod lang sa pipila ka oras, “wherein we question of the— if the members of the House of Representatives who signed, read the articles of impeachment.”
Sayo niini, gisulti ni kanhi senadora Leila de Lima nga kung ang impeachment trial batok Duterte di madayon tungod "odds are stacked" batok sa prosekusyon, mahimo kining pagluib sa sistema sa hustisya.
Isip tubag, gikanayon ni Duterte nga wala siya masayud kung ang impeachment mapadayon. Apan iyang gitugon ang iyang defense team nga mangandam alang sa bisan unsang mahitabo ug isalig kini ngadto sa Senado sa paghukom sa articles of impeachment. Samtang di pa tataw ang mahitabo, ang importante nga ang iyang legal defense team andam na.
Kahinumdoman sab nga ang impeachment ni Duterte naaprobahan sa Kongreso human 215 kang kongresista "filed and verified" sa ikaupat nga reklamo, nga nasentro sa gialegar nga pagwaldas sa confidential funds ug mga hulga nga gihimo batok sa mga tag-as nga opisyal.