GIDUSO ni Konsehala Luna Maria Acosta sa Davao City ang pagkimpit (clamp) sa mga illegal nga nagparada og mga behikulo sa dakbayan human nga nitaas ang maong kalapasan nga nakatampo sa pagsamot og paghuot sa trapiko.
Si Acosta, kinsa tsirman sa Committee on Peace and Public Safety and the Committee on Anti-Terrorism, nagsulti nga nagplano siya nga moduso og Clamping Zone Ordinance tubag sa nagkadaghan nga ihap sa ilegal nga pagparada sa mga behikulo sa tibuok siyudad.
“So we will designate clamping areas in the downtown and other streets in Davao City kung saan bawal na mag-park. If you park there, your vehicle would be clamped, lalagyan talaga para hindi ka makaalis,” pagpasabot niya atol sa Pulong Pulong sa Dabawenyos, Martes, Agosto 5, 2025, sa Sangguniang Panlungsod.
Hinuon, gitin-aw ni Acosta nga naa pa sila sa proseso sa pag-ila sa espisipiko nga mga lugar nga magkimpit, apan posibleng maglakip kini sa mga nag-unang kadalanan. Pipila sa mga lugar ang gikonsidera mao ang Quimpo Boulevard, R. Castillo Street, ug uban pang lokasyon nga naila tungod sa grabe katrapik.
Iyang gitin-aw nga mga pay parking areas ug mga gidesignar nga libreng paradahan o parking zones sa dakbayan di maapektuhan sa gisugyot nga "clamping zones". Ang siyudad kasamtangang nagproseso sa pagpalit og pangkimpit aron nga ipatuman ang pamaagi.
Matud ni Acosta, mga tag-iya og behikulo kansang mga sakyanan makimpit kinahanglan nga mobayad og multa una ang kimpit tanggalon. Ang multa magsugod gikan P1,000 hangtud P3,000, agad sa gidak-on sa behikulo.
Ang konsehala nagsulti sab nga ang ordinansa maglambigit sa pag-amenda traffic code sa siyudad, aron mga awtorisado nga sakop gikan sa City Transport and Traffic Management Office (CTTMO) maoy mopatuman sa operasyon sa pagpangimpit.
Naglaum si Acosta nga ang "clamping ordinance" maaprobahan sa Konseho sa siyudad sa di pa matapos ang 2025. (Rojean Grace G. Patumbon)