
SAMAL ISLAND, Davao del Norte — Dunay hypertension ang 23-anyos nga napalgang wala nay kinabuhi sa Purok Lower Lidao, Barangay Poblacion, Kaputian District, Island Garden City of Samal (IGaCoS) alas 8:30 sa buntag, Marso 17, 2025.
Sumala ni Police Senior Sergeant Mattmon Retes, imbestigador sa IGaCoS PNP nga ila nang nakahinabi ang pamilya sa biktima nga si alyas Mat-mat, taga Purok 1, Barangay Bandera, Kaputian District.
Nasayran nga mibutyag ang mga ginikanan sa biktima nga na-diagnose na ang biktima sa hypertension ug mao ni ilang gitan-aw nga nag-unang hinungdan sa kamatayon niini.
Sa imbestigasyon, nasayran nga gabii sa Marso 16, nananghid ang biktima nga manginhas apan mibuntag na lang wala pa kini kauli, hinungdan nga ilaha nang gisubay ang daplin sa kadagatan.
Taud-taod dunay usa ka mananagat misulti nga duna kini nakit-ang naglutaw nga tawo nga posibleng wala nay kinabuhi. Positibo nga ang naglutaw mao ang biktima kinsa giila dayon sa iyang mga kabanay.
Nagtuo ang kabanay nga gi-atake ang biktima sa highblood hinungdan nga nalumos kini.
Walay foul play nga nakita ang awtoridad sa pagkalumos-patay sa batan-on. (Jeepy P. Compio)