COTABATO CITY -- Bugto ang kinabuhi sa usa ka pulis samtang naangol ang upat niya ka mga kauban sa pagkabangga sa ilang gisakyan nga patrol car alas 9:30 sa gabii, Dominggo, Disyembre 8, 2024, sa Buldon, Maguindanao del Sur.
Giila ang nakabsan sa kinabuhi nga si Corporal Cairodin Rumidas samtang mga naangol mao sila Patrolman Diamalodin Esmail, Patrolman Ismael Tagadaya, Corporal Baseron Aratuc, ug Staff Sergeant Musa Calocop nga pulos mga sakop sa Buldon Municipal Police Station.
Matud ni Maguindanao del Sur Police Provincial Office Director, Police Colonel Joel Estaris nga sakay ang mga biktima sa ilang patrol car gikan sa Police Regional Office-Bangsamoro Autonomous Region (PRO-BAR) Headquarters ug paingon unta sa Cotabato City.
Apan pag-abot nila sa Barangay Gang, Sultan Kudarat, Maguindanao del Norte, mi-overtake ang patrol car sa laing sakyanan apan dunay kasugat nga laing sakyanan, busa milikay ang patrol car apan wala mikagar ang preno tungod sa kabasa sa dalan kay nag-ulan hinungdan sa pagkabangga niini sa balay ug motorsiklo nga nagparking kilid sa kalsada.
Nalagpot si Corporal Rumidas nga maoy hinungdan sa iyang kamatayon samtang mga kauban niini naangol ug gihatud sa balay tambalanan.
Nagpasidaan ang lokal nga panggamhanan sa Sultan Kudarat sa mga drayber nga mag-amping sa pagmaneho ilabi na sa ting-ulan aron malikay sa disgrasiya. (Edgar E. Fuerzas)