GITAMBAGAN sa progresibong mga grupo si Davao City Acting Mayor Sebastian “Baste” Duterte ug Philippine National Police (PNP) Chief Police Brigadier General Nicolas Torre III nga ihunong na ang "drama" ug motutok sa dinalian nga mga isyu sa nasud.
Gikanayon ni Fauzhea Guiani sa Anakbayan Southern Mindanao Region nga ang posibleng pagsinumbagay nila Duterte ug Torre pantalya lang sa kasamtangang kahimtang sa katawhang Pilipino. Matud niya nga di na kini bag-o sa nasud nga dunay mga pagbaha di lang sa Luzon apan bisan sa Davao City.
“Focus po tayo na ginakasinati sa atoang dakbayan and sa mga Dabawenyo. Tama na ang theatrics, tama na ang mga kung ano-ano na performances labi na gikan sa atoang mga public officials,” hangyo niya atol sa presscon, Biyernes, Hulyo 25, 2025.
Awhag niya nga kinahanglan nga ihunong na ang ilang mga gimik ug himuon ang pagserbisyo nga gilauman gikan kanila ug mohatag og mga solusyon ngadto sa mga isyu nga giatubang karon sa nasud.
Sayo niini, gihagit ni Duterte si Torre og sinumbagay, nag-akusar kaniya nga isog kay naa sa posisyon. Apan iyang giinsister nga si Torre talawan ug "could take him on in a real fight."
Gitubag kini ni Torre niadtong Hulyo 23, tulo ka adlaw ug nisugyot nga ang sinumbagay himuon nga "charity boxing" sa Araneta Coliseum.
Isip tubag, gikanayon ni Duterte nga mosugot lang siya nga magsinumbagay ni Philippine National Police (PNP) Chief Nicholas Torre—kung tanang mga pinili nga mga opisyal mopailawom og "hair follicle drug test".
"These are my conditions, pakiusapan mo yang amo mong presidente (Talk to your president) and let it come out from his mouth that all elected officials should undergo a hair follicle drug test," matud ni Duterte sa teaser sa iyang Basta Dabawenyo podcast nga gipagawas niadtong Hulyo 24. (Rojean Grace G. Patumbon)