GI-DEMOLISH ang usa ka payag nga nahimutang sa may public access road, Martes sa buntag, Mayo 21, 2024.
Ang maong payag nailhan nga gipanag-iyahan sa grupong Amihan sa Dahican, Balod sa Paglaum Inc. apan ang luna iya sa lokal nga panggamhanan sa Mati City.
Plano sa lokal nga panggamhanan nga tukuran og baywatch tower kun substation sa Task Force Mati Shoreline Management nga pagalangkuban Philippine Coast Guard, Mati Tourist Police, Philippine Maritime Police, Bantay Dagat, Bureau of Fisheries and Aquatic Resources (BFAR) ug uban pang ahensiya.
Tumong sa maong task force nga maseguro ang seguridad sa mga lumalangoy ug uban pang bisita sa Dahican Beach.
Tumong sab sa pagtukod sa maong substation nga hingusgan ang pagprotekta ug tabang paglikay sa uban pang mga insidente sa Dahican Shoreline sama sa polusyon, pagkataga sa mga lumalangoy, ug uban pa.
Sumala ni City Administrator Alan Andrada, tuig 2010 pa unang naisyuhan og notice to vacate ang Amihan. Konsehal pa sa Mati niadtong tungura si Andrada nga chairman sa Committee on Environment.
Giklaro ni Andrada nga ubay-ubay na nga mga notices ang ilang nahatag sa Amihan sugod 2023 kalabot sa pagpabalhin sa ilang payag ngadto sa lugar nga dili makaali sa public access road apan wala kini panumbalinga sa maong grupo.
Samtang plano sab sa City Admin nga ibalhin ang Amihan hatchery sa Menzi shoreline aron sa mas luwas ug hapsay na environment alang sa mga pawikan ug aron malayo sa public disturbance tungod kay kasamtangan pa kining nahimutang sa public access road.
Ang pagbalhin sa hatchery rekomendasyon sab sa DENR, CiENRO, academe ug uban pang ahensya sa gobyerno kaniadto pang tuig 2023 subay sa Republic Act 9147 kon Wildlife Resource Conservation and Protection Act.
Aduna sab gimugna ang City Administrator’s Office na zoning ug laning map sa Dahican Beach alang sa mga fisherfolks ug mga bisita subay sa mas hiningusgan na seguridad sa Dahican Shoreline ug dili lamang sa public access road.
Adunay 3 ka zones na gimugna nga mao ang “no swimming zone”, “swimming zone” ug “angling area”.
Aduna sab gihimo na fishing/mooring area ug navigation lane para sa mga mananagat aron malikayan ang mga aksidente sa mga lumalangoy nga maigo sa mga taga.
Magpatuman usab og curfew sa Public Access Road sa may Amihan sugod alas sais sa gabii hangtud alas singko sa kabuntagon aron mas malikayan ang mga aksidente sa lugar.
Magbutang usab og mga buya kon buoys sa dagat aron kagiyahan ang mga mananagat ug mga lumalangoy.
Dako ang paglaum sa lokal na panggamhanan na mamenusan ang mga aksidente sa may Dahican Shoreline pinaagi sa implementasyon sa zoning ug laning areas ilabi na nga ginadahum ang pagtaas sa numero sa mga bisita ug turista karong bulan sa Mayo ug Hunyo tungod sa umaabot nga Summerfrolic.
Gawas pa ini, andam moresponde ang Task Force ug monitoring team sa may Dahican Shoreline sa mga posibleng aksidente na mahitabo. (JPC/Jasmin Tia, CIO Mati)