GIPAHIBALO sa National Commission of Senior Citizens Cluster 8-Davao Region (NCSC-Davao) nga ang payout alang sa mga senior citizens nag-edad og 80, 85, 90, ug 95 magsugod na.
Kini subay sa Republic Act 11982, labing nailhan nga Expanded Centenarian Act.
Si Maria Victoria Arancon, project development officer sa NCSC sa Davao Region ug Caraga Region, nagsulti nga ang dinungan nga unang payout himuon sa Pebrero 26, 2025, sa Davao City Recreation Center, kanhi Almendras Gym, sa pakig-koordinar sa uban pang mga buhatan.
“Mag-start na po ang implementation [We will start on the implementation] of the RA 11982 and this is the Octogenarian, Nonagenarian, and Centenarian Act,” butyag niya atol sa Kapehan sa Dabaw, Lunes sa buntag, Pebrero 10, 2025, sa SM City Davao.
Dugang ni Arancon nga human ang Davao City, ang pay-outs gitakda alang sa Davao del Norte, uban ang 29 ka benepisyaryo; Davao de Oro nga dunay 10; ug Davao Occidental nga dunay 10. Matud niya nga ang central office nagbalidar na sa ihap sa mga benepisyaryo nganatawo sa Enero una ihatag ang kuwarta.
Iya sab nga gidasig ang mga benepisyaryo kinsa niabot na og taas nga pangedaron nga moaplay gilayon kay ang NCSC padayon pang nagdawat og mga aplikante.
Gikanayon ni John Ritrex G. Juanich, project development officer sa NCSC, nga sa Davao City lang, dunay mga 78 ka benepisyaryo, apil ang octogenarians, nonagenarians, ug centenarians.
Eksplikar ni Juanich nga ang octogenarians ug nonagenarians makadawat P10,000 matag usa, samtang ang centenarians modawat og P100,000.
Gitin-aw sab ni Juanich nga mga benepisyaryo di makadawat sa cash incentives matag tuig. Inay makadawat sila niini kung makaabot na sila og 80, 85, 90, ug 95.
Pipila sa mga rekisitos nga gikinahanglan sa mga benepisyaryo naglakip sa Philippine Statistics Authority (PSA) Birth Certificate o PSA ID. Dugang pa niya nga kinahanglan nilang mobisita sa pinakaduol nilang Office for Senior Citizens Affairs (OSCA), nga maoy kauban sa NCSC sa pagpatuman niini.
Kahinumdoman, si President Ferdinand Marcos Jr. nagpirma sa Republic Act 11982, labing nailhan isip "An Act Granting Benefits to Filipino Octogenarians and Nonagenarians," niadtong Pebrero 26 sa katapusang tuig.
Ang akta maghatag og P10,000 cash incentive alang niadtong nakaabot na sa maong mga edad. (Rojean Grace G. Patumbon)