Payuhot og shabu giagi sa parcel

Payuhot og shabu giagi sa parcel
DCPO

GIANGKON mismo sa usa ka piniriso sa Toril Police Station nga duna pa siya’y daghang shabu nga gitagoan sa ilang balay, diin gikan kini sa Manila, gi-parcel, agi sa Cagayan de Oro City padung sa Davao City.

Kini ang gibutyag sa suspek nga si alyas Mario, 51-anyos, taga Barangay Maa, Davao City kinsa usa ka Person Under Police Custody (PUCP) sa kapulisan sa Toril PNP.

Sumala ni Toril PNP officer-in-charge Station commander Police Captain Francisco Catabas Jr., nga bandang alas 3:15 kagahapon sa kaadlawon, Miyerkules, Hulyo 3, 2024, gilayong giadtoan sa mga pulis ang balay sa suspek sa Brgy. Maa.

Pag-abot sa mga pulis sa balay sa suspek, na-rekober ang usa ka jumbo size sa selopin nga gibalot sa packaging tape dunay unod sa gituohang shabu nga mokantidad og P6,949,000.

Nasayran gikan kang Davao City Police Office (DCPO) spokesperson Police Captain Hazel Tuazon sa SuperBalita Davao nga ang suspek nadakpan sa Task Force Davao ug Toril Police Station Fixed Checpoint niadtong Hulyo 1, 2024 nga may dalang shabu nga mokantidad og kapin P100 mil ug usa ka pistola.

Gituohang shabu anaa na sa kustodiya sa Toril PNP ug nakatakdang dalhon sa PNP Crime Laboratory alang sa eksaminasyon ug tukmang disposasyon sa ebidensiya.

Tungod niini nga hitabo, usa ka lawom nga imbestigasyon ang gihimo sa Davao City Police sanglit sa mga naunang report sa Sta. Ana Police Station ilang nadakpan ang usa ka babaye atol sa buy-bust operation kinsa miangkon nga ang mga shabu nga anaa kaniya gi-parcel kaniya gikan sa Metro Manila.

Busa ang DCPO mihimong imbestigasyon sa susamang mga hitabo nga gipang-agi kini sa parcel.

Sumala ni Sta. Ana PNP OIC Station Commander Police Captain Rizalito Clapiz lll nga posibleng usa na sab kini ka pamaagi sa mga suspek nga ipaagi sa parcel hinungdan nga ilang gipakusgan ang ilang intel-monitoring aron ila dayon nga ikasa ang lihetimo nga buy-bust operation.

Gikuhaan sa SuperBalita Davao og opinyon ang usa ka traysikad drayber nga usa ka 55-anyos nga si Gerald Bulotano, taga Piapi Boulevard, Davao City, diin sumala niya nga ang parcel usa ka paamagi sa mga drug lords aron ilang dali nga mapadala sa usa ka lugar ang ilegal nga druga, ug niya pa, kinahanglan dunay kusgan nga balaod nga mo-monitor sa mga parcel.

“Wala na man gud gina-x ray or naay dagko nga sindikato ang nagpaluyo aning bag-o nilang nga pamaagi sa pagpadala sa shabu nga isulod na lang sa parcel, unta naay mangtas kaayo nga balaod ang mo-regulate niini,” ingon ni Bulotano sa SuperBalita Davao.

Sa habig sa kapulisan, hugot nga intel-monitoring ang ilang ipatuman aron madakpan ang suspek ug aron dili pa matagtag sa mga parokyano ang shabu ugaling binulto kini nga ipadala sa parcel.

Sa kasamtangan, giimbestigahan ang mga dinakpan samtang sila nag-atubang og kasong pagsupak sa Republic Act 9165 kun Comprehensive Dangerous Drugs Act of 2002 sa korte. (Jeepy P. Compio)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph