Pedestrian pasakaa'g kaso

Pedestrian pasakaa'g kaso
Hulagway screenshot sa gipagula nga kuha sa CCTV

LUYO sa pagpasaka og kaso sa mikalit og tabok sa kalsada nga miresulta sa pagkadisgrasya sa trak nga mikalas sa duha ka kinabuhi, gipangita na sab karon sa Buhangin Police Station ang drayber sa dyip nga gisakyan sa maong pasahero.

Sa mga nag-viral nga video sa social media, makita ang dyip nga mihunong pa sa pedestrian lane bisan og naka-GO na, mikanaug si alyas Eva, dayon mitabok, maong mikalit og brake ang trak nga miresulta sa duguong aksidente.

Naukay ang mga motorista, Hunyo 25, 2024, sa hapon atubangan sa Davao International Airport human makita ang drayber ug pahinante sa trak nga naipit ug natusok sa karga nilang bakal, human nilusot sa higot kay mikalit og brake ang trak aron di maligsan ang mitabok sa dalan nga pedestrian bisan og naka-go na ang signal.

Mga biktima giilang sila Nestor Dela Cruz Doronio, 56-anyos, taga New Ilocos, Magsaysay, Davao del Sur ug pahinante nga si KR Salem Rason Able, 24-anyos, taga Km. 82 Marber, Bansalan, Davao del Sur.

Sa inisyal nga imbestigasyon, subay sab sa mga nakasaksi, nga samtang nagdagan ang trak gikan sa North bound paingon sa South, pag-abot sa maong lugar kalit may mitabok nga babaye nga base sa pagsusi sa kapulisan nailhan kining si alyas Eva, 32-anyos, Airport Security Assistant ug taga Brgy. Sasa, Davao City.

Sa pahayag sa Davao City Police Office, atol sa AFP-PNP Press Conference kagahapon, Hunyo 26, 2024, diin sumala ni DCPO spokesperson Police Capt. Hazel Tuazon nga pasakaan og kasong Reckless Imprudence resulting to Homicide si alyas Eva kinsa anaa na sa kustodiya sa kapulisan. (Jeepy P. Compio)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph